Keçmiş məhkum yenidən külli miqdarda narkotik vasitə ilə həbs olunub...
Binəqədi Rayon Məhkəməsində Cinayət Məcəlləsinin 234.4.3-cü ( külli miqdarda narkotik vasitələri saxlama, daşıma və satma) və və 206.3.2-ci (qaçaqmalıçılıq) maddələri ilə həbs edilən İsayev Ceyhun Fikrət oğlunun həbs müddətinin uzadılması məsələsinə baxılacaq. Məhkəmə prosesi hakim Elçin Ağayevin sədrliyi ilə keçiriləcək.
Bakı Şəhər Baş Polis İdarəsinin Mətbuat xidmətindən verilən məlumata görə, 2019-cu ilin avqust ayında Binəqədi Rayon Polis İdarəsinin Cinayət Axtarış Şöbəsinin keçirdiyi əməliyyat-axtarış tədbirləri nəticəsində külli miqdarda narkotik vasitələrin qanunsuz dövriyyəsində şübhəli bilinən 1985-ci il təvəllüdlü Bakı şəhəri, Binəqədi rayonu, Biləcəri qəsəbəsi sakini, əvvəllər məhkum olunan İsayev Ceyhun Fikrət müəyyən olunaraq tutulub. Şübhəli şəxs Binəqədi şosesi, DSK adlanan ərazidə saxlanılan zaman üzərində olan çantadan ayrı-ayrı bükümlərdə - hər birində 495 qram, digərində 510 qram olan metamfetamin, 763 ədəd yaşıl rəngli ümumi çəkisi 160,23 qram olan metamfetamin, 1004 ədəd ümumi çəkisi 210,84 qram olan çəhrayı rəngli metilendioksin, ekstazi aşkar olunub. F.İsayev ilkin izahatında narkotik vasitəni iki gün əvvəl "Baksol yolu" adlanan ərazidə tanımadığı İran İslam Respublikasının vətəndaşından aldığını bildirib.
pia.az