ABŞ-da bir əczaçı koronavirus peyvəndlərinin insanlara zərər verdiyini düşünərək, yüzlərlə peyvənd dozasını soyuducu anbardan çıxardığını etiraf edib. Məlum olduğu kimi peyvəndlər xüsusi soyuducularda saxlanılmazsa, öz təsirini itirir.
Musavat.com BBC Türkçə-yə istinadən bildirir ki, ABŞ prokurorluğunun araşdırmasına görə Vinkonsin əyalətinin Qrafton bölgəsində yaşayan 46 yaşlı Stiven Brandenburq iki gecə növbəsində 570 dozalı 57 "Moderna" peyvəndini soyuducudan çıxararaq, saatlarla bayırda saxlayaraq, yenidən yerinə qaytarıb. Məsələdən xəbərsiz həmin peyvəndlər 57 nəfərə vurulub.
Bu addımına görə Brandenburqu 20 ilə qədər həbs və 250 min dollar cərimə gözləyir.
Araşdırma zamanı o da məlum olub ki, adı çəkilən əczaçı başda "Moderna" olmaqla, digər bütün peyvəndlərə şübhə ilə yanaşır.
Qeyd edək ki, ABŞ yoluxma sayına görə aylardır ki, dünya ölkələri arasında liderdir. Bu günə qədər ölkədə 26,1 milyondan çox insan koronavirusa yoluxub, onlardan 440 minə yaxın nəfəri dünyasını dəyişib.
pia.az