Pərviz Şahbazov: Azərbaycan neft bazarında balansın saxlanmasının tərəfdarıdır

Azərbaycan apreldə OPEC+ çərçivəsində sazişin icrası üzrə göstəriciləri yaxşılaşdırmağa ümid edir

Bunu energetika naziri Pərviz Şahbazov bu gün Bakıda OPEC+ Birgə Monitorinq Komitəsinin 13-cü iclası çərçivəsində keçirilən mətbuat konfransında deyib.

“Məlum olduğu kimi, 2018-ci ilin dekabr ayında biz OPEC+ sazişi çərçivəsində üzərimizə yeni öhdəliklər götürdük. Lakin hələlik onlar tam icra olunmayıb. Biz bu saziş çərçivəsində öhdəliklərimizin həyata keçirilməsi çərçivəsində fəal çalışırıq və gələn il göstəricilərimizi yaxşılaşdırmağa ümid edirik”, - deyə P.Şahbazov bildirib.

Həmçinin, nazir vurğulayıb ki, OPEC+ ilə əməkdaşlıq çərçivəsində 2,5 il ərzində Azərbaycan qəbul olunan qərarlar çərçivəsində öz öhdəliklərini tam yerinə yetirib.

“Biz bu əməkdaşlığı davam etdirmək, gələcəkdə OPEC+ formatını dəstəkləmək və onun fəal iştirakçısı olmaq niyyətindəyik. Biz görürük ki, nəinki Azərbaycanın, həm də kartelə və OPEC+-a daxil olan ölkələrin fəal iştirakı bazarda balansın təminatı məqsədilə yaxşı nəticə verir”, - nazir qeyd edib.

Xatırladaq ki, dekabrın 7-də qəbul olunan OPEC+ üzrə yeni sazişə əsasən, OPEC üzvləri neft hasilatını sutkada 800 min barel, kartelə daxil olmayan ölkələr isə 400 min barel azaldacaqlar.OPEC ölkələri neft hasilatının 2,5%, qeyri-OPEC ölkələri – 2% azaltmağa dair öhdəlik götürüblər. Saziş 2019-cu ilin aprel ayında mümkün nəzərdən keçirilməsi şərti ilə yarım il müddətinə uzadılıb.

Azərbaycan OPEC+ ilə razılıq çərçivəsində gündəlik neft hasilatını 2018-ci ilin sentyabr ayının göstəricisi ilə müqayisədə 2,5 % və ya 20 min barel - 776 min barelədək azaltmaq öhdəliyi götürüb.(virtualaz.org)