Azərbaycan Müdafiə Nazirliyi Kəlbəcərdəki Zod (Söyüdlü) qızıl yatağındakı hazırkı vəziyyəti əks etdirən videokadrlar yayıb. Videokadrlara əsasən ordumuz qızıl yatağının indiyədək Ermənistan tərəfindən qanunsuz istismar edilən hissəsinə tam nəzarət edir və orada stasionar post qurub. Nəticədə yataqda hasilat işləri aparan “GeoProMining” şirkətinin ağır texnikası, yükünü özüboşaldan maşınları ordumuzun nəzarəti altındadır, yataqda hasilat işləri isə dayanıb.
Kəlbəcər rayonu 10 noyabr üçtərəfli razılaşmasına əsasən noyabrın 25-də Azərbaycanın nəzarətinə qaytarılıb. Azərbaycan ordusunun bölmələri Murov aşırımı və Daşkəsən istiqamətindən çətin keçilən dağ yolları ilə hərəkət edərək Kəlbəcərdə müəyyən olunmuş mövqeləri tutublar, o cümlədən Azərbaycan-Ermənistan dövlət sərhədinin Söyüdlü yatağından keçən hissəsinə nəzarəti ələ alıblar. Bundan əvvəl Ermənistan tərəfi sərhədin həmin hissəsindən Azərbaycan ərazilərinin 1.5 kilometr içərilərinə doğru, Ağdərə-Vardenis yolunun üzərində darvaza qoymuşdu və yolu bağlamışdı.
Lakin Azərbaycan ordusu həmin darvazanı sındırıb və dövlət sərhədini bərpa edib. Nəticədə Söyüdlü yatağının əsas hissəsi ordumuzun nəzarəti altına keçib, yataqda hasilat işləri aparan şirkət işləri dayandırıb. Erməni tərəfinin bildirdiyinə görə, hazırda sərhədlərin demarkasiyası barədə müzakirələr gedir. Lakin sovet dövrü xəritəsinə əsasən Söyüdlü yatağının 70 faizə yaxın hissəsi Azərbaycan ərazisinə düşür və bu səbəbdən Ermənistan yataqdan çəkilməli olacaqlarını təsdiq edir.(virtualaz.org)
pia.az
Digərxəbərlər
Populyar xəbərlər
