Ukrayna ölkə ərazisinin peyk çəkilişlərini məhdudlaşdırmaq qərarına gəlib və buna cavabdeh olan şirkətlə danışıqlara başlayıb...
Poliqon xəbər verir ki, bu barədə məlumat Ukrayna Müdafiə Nazirliyinin "Telegram" kanalında yer alıb.
Nazir müavini Yekaterina Çernorenkonun sözlərinə görə, Ukrayna ərazisinin təsvirləri düşmən tərəfindən istifadə oluna bilər, ona görə də riskləri minimuma endirmək üçün peykdən çəkilən görüntülər məhdudlaşdırılmalıdır.
Nazirlik danışıqların davam etdiyi şirkətin adını açıqlamır. Amma qeyd edilir ki, o hazırda dünyada yeganə şirkətdir ki, hər gün 3-5 m təsvir ölçüsündə Yerin bütün səthini çəkir.
Bundan əlavə, Müdafiə Nazirliyi münaqişə zamanı kosmik kəşfiyyatı qadağan edəcək beynəlxalq hüquqi mexanizmlər hazırladıqlarını bəyan edib.
Martın 16-da "Reuters" xəbər verdi ki, milyarder İlon Maskın "SpaceX" şirkəti ABŞ kəşfiyyat agentliyi ilə gizli müqavilə əsasında yüzlərlə casus peykdən ibarət şəbəkə qurur. Agentliyin məlumatına görə, yeni aşkarlanan məlumatlar "SpaceX"ə məxsus "Starlink" peyk rabitəsinin Ukraynadakı müharibədə istifadəsində yeni fəsildən xəbər verir.
Poliqon.info