“Günün ən mühüm hadisəsi Elman Rüstəmovun istefasıdır. Dəfələrlə bildirdiyim kimi, onun Mərkəzi Bankın sədri olaraq mövcudluğu bank sisteminin bərbad idarəedilməsinin və çoxsaylı qanun pozuntularının davamı ilə yanaşı devalvasiya təhlükəsindən xəbər verirdi. İki il əvvəl də vəzifəsinə yenidən təyin edilməli deyildi, sadəcə, pandemiya planları pozdu. Onda da demişdim ki, bu dəfəki 5 illik müddətinin sonunadək vəzifəsində qalmayacaq. Belə də oldu. Denasifikasiya vurğunu Putinin həmyaşıdı olan devalvasiya vurğunu Rüstəmov gedir. Sağ əli birincinin başına…”
PİA.az-ın xəbərinə görə, bunu ekspert Əkrəm Həsənov bildirib.
Ə.Həsənov qeyd edib ki, geosiyasi gərginlik fonunda neftin qiymətinin düşməsi ehtimalı çox azdır:
“Deməli, manat üçün də təhlükə yoxdur. Paradoks: Rüstəmovun imzası əskinaslarında olan manat üçün yalnız o vəzifədən gedəndə arxayın ola bilirik. Bu baxımdan Mərkəzi Bank sədrinin dəyişdirilməsi üçün əlverişli məqam yetişdi. Ümid edirəm ki, yeni sədr bank sistemimizin inkişafı üçün faydalı şəxs olacaq. Eyni zamanda, Rüstəmov dövrünün qanun pozuntularının da araşdırılıb təqsirkarların məsuliyyətə cəlb olunacağına ümid edirəm. Hər şeyin başında duran qanundur. Yeni rəhbərdən də məhz bunu gözləyirik!” (Pravda)
pia.az