Ərdoğan ABŞ və daha 9 ölkənin səfirinin “persona non qrata” elan olunmasını istəyib

Türkiyə Prezidenti Rəcəb Tayyib Ərdoğan Türkiyədə fəaliyyət göstərən 10 ölkənin səfirinin “persona non qrata” elan olunmasını istəyib.

APA-nın yerli bürosunun xəbərinə görə, bu barədə Türkiyə Prezidenti Əskişəhərdə millət bağçası, xalq kitabxanası və inşaatı başa çatan bir çox layihələrin açılışında danışarkən deyib.

Prezident Ərdoğan bu gün Eskişehirdə bir sıra layihələrin açılış mərasimində çıxışı zamanı həmin ölkə səfirlərinin ünvanına sərt ifadələr işlədib: “Yatırlar, qalxırlar, Kavala ha Kavala...Kavala dediyin Sorosun Türkiyə şöbəsi...10 dənə səfir onun üçün Xarici İşlər Nazirliyinə gəlir. Bu nə tərbiyəsizlikdir ya... Siz burayı nə zənn edirsiniz ya? Burası Türkiyə... Türkiyə... Burası sizin zənn etdiyiniz kimi hansısa qəbilə dövləti deyil. Burada təlimat vermək kimi bir yola əl ata bilməzsiniz. Gərəkli təlimatı mən xarici işlər nazirinə verdim. Bu 10 dənə səfirin arzuolunmaz adam elan edilmələrini dərhal həll edəcəksiniz dedim. Bunlar Türkiyəni tanıyacaq, anlayacaq, biləcəklər. Türkiyəni bilmədikləri, anlamadıqları gün buranı tərk edəcəklər”, deyə Ərdoğan bildirib.

QHT fəalı və biznesmen olmuş Osman Kavalanın həbsinin 4 ilinin tamam olması münasibətilə oktyabrın 18-də ABŞ, Fransa, Almaniya, Hollandiya, İsveç, Norveç, Finlandiya, Danimarka, Kanada və Yeni Zelandiyanın Türkiyədəki səfirləri ortaq bəyanat imzalamışdı. Həmin açıqlamada Avropa İnsan Haqları Məhkəməsinin barəsində bəraət qərarı çıxardığı Kavalanın dərhal azad edilməsi tələb edilirdi. Bu bəyanatla bağlı səfirlər Türkiyə XİN-ə çağırılıb və onlara ölkənin daxili işlərinə qarışdıqları, Kavala barəsində davam edən məhkəmə prosesinə təsir göstərməyə cəhd etdikləri üçün xəbərdarlıq bildirilib.

Qeyd edək ki, Türkiyədə 2013-cü ildə baş verən Gəzi Parkı hadisələrinə görə və 2016-cı ilin 15 iyulunda dövlət çevrilişinə cəhddə ittiham edilərək həbs olunan iş adamı Osman Kavalanın azadlığa buraxılması üçün ABŞ, Fransa, Almaniya, Hollandiya, İsveç, Norveç, Finlandiya, Danimarka, Kanada və Yeni Zelandiya səfirləri bir həftə öncə ortaq bəyanat imzalayıblar.