“Hüseynbala Mirələmovla bağlı baş verən məsələyə çox pis oldum. Mənim üçün gözlənilməz idi. Ağsaqqal adamdır, bu necə olub? Nə ad qoymaq olar? Bəlkə başqa məqsədlə deyil... Amma yozmaq da olmur”.
Bunu Pravda.az-a açıqlamasında Milli Məclisin Hüquq siyasəti və dövlət quruculuğu komitəsinin üzvü Tahir Kərimli deyib.
T.Kərimli cəmiyyətin bu məsələyə reaksiyasını normal qiymətləndirdiyini qeyd edib: “Bunu kim müsbət qiymətləndirə bilər ki? Hüseynbala Mirələmov Azərbaycan Dövlət Neft və Sənaye Universitetinin Qaz Neft Mühəndisliyi fakültəsinin kafedra müdiri vəzifəsindən azad edilib. Yeni Azərbaycan Partiyasından da istefa verər. Qınaq varsa, reaksiya vermək ən yaxşı yoldur. Türkiyədə Dəniz Baykalla bağlı belə bir məsələ baş vermişdi. O, dərhal partiyadan istefa verdi. Analoji addımın atılması vacibdir. Sual verə bilərlər ki, niyə Milli Şuranın sədri Cəmil Həsənli ilə bağlı məsələyə bir cür, Hüseynbala Mirələmova başqa cür yanaşılır? Hüseynbala Mirələmov istefa verməlidir, başqa yol da yoxdur. Bu hal fəaliyyət göstərdiyi universitetdə onlayn görüş zamanı yaşanıb. Görüş digərləri üçün də açıq olub, qapalı olmayıb. Ona görə də videonun yayılması şəxsi həyata müdaxilə hesab edilmir. Evində və ya başqa qapalı məkanda olsaydı, videonun yayılması şəxsi həyata müdaxilə kimi qiymətləndirilə bilərdi”.
Deputat videonun yayılması ilə bağlı versiyalara da toxunub: “Ən müxtəlif versiyalar irəli sürürlər. Bildirirlər ki, Rusiya və Belarus arasında ittifaqın yaradılması müzakirə edilir, ona görə video ortaya atılıb, gündəmi dəyişirlər. Hətta iddia edirlər ki, Cəmil Həsənlinin qızının məsələsinə reaksiyadır. Doğrudan da, maraqlıdır, onlayn görüş yanvarda olub, amma video dünən yayılıb... Siyasi və ya qisas almaq məqsədilə də ola bilər. Bunun motivi araşdırılmalıdır”.
pia.az
Digərxəbərlər
Populyar xəbərlər
