Mənzil İnşaatı Dövlət Agentliyinin (MİDA) layihəsi olan Yasamal Yaşayış Kompleksindən mənzil alan bir neçə vətəndaş hüquq-mühafizə orqanlarına müraciət edib.
Vətəndaşlar müraciətlərində mənzil aldıqları binalarda təmir-tikinti işlərinin tam olaraq yekunlaşmadığından gileylənirlər.
Müraciətlərdə əsasən qeyd olunur ki, binalarda lift sistemi quraşdırılmayıb, dam örtüyü də hazır deyil. Mənzil alan vətəndaşlar qarşı tərəfin öhdəliklərini yerinə yetirmədiyini bildirirlər.
Bəzi müraciətlərdə isə vətəndaşlar yazırlar ki, adı çəkilən yaşayış kompleksində aldıqları mənzillərə daxil ola bilmirlər. Pul verib aldıqları mənzillər onlara təhvil verilmir.
Şikayətlər əsasən Yasamal Yaşayış Kompleksindəki 27, 28 və 29 nömrəli binalarla bağlıdır.
Məsələ ilə bağlı Musavat.com olaraq MİDA-ya sorğu ünvanladıq. Sorğumuza cavab olaraq bildirildi ki, “KAT Holdinq” MMC ilə bağlanmış müqavilənin şərtlərinə görə, inşa olunacaq üç binadan biri Agentliyin sərəncamına verilməli, digər iki bina isə “KAT Holdinq” MMC-nin sərəncamında qalmalı idi.
Sorğuya cavabda göstərilir ki, “KAT Holdinq” MMC bu günə kimi öz payına düşən tikinti obyektlərini inşa edərək istismara hazır vəziyyətdə təhvil verməyib.
“Bununla bağlı müxtəlif vətəndaşlardan daxil olan şikayətlər nəzərə alınaraq tərəfimizdən Azərbaycan Respublikasının Baş Prokurorluğuna müvafiq müraciətlər ünvanlanıb, “KAT Holdinq” MMC-nin əməllərinin araşdırılması və qaldırılan məsələyə hüquqi qiymət verilməsi istiqamətində tədbirlərin görülməsi xahiş edilib. Hazırda Baş Prokurorluqda qeyd olunan məsələlərlə bağlı istintaq tədbirləri davam etdirilir”,- deyə Agentlikdən verilən açıqlamada qeyd edilir.
Əldə etdiyimiz məlumata görə, adı çəkilən holdinqin rəhbəri həbs edilib. Şikayətlər isə holdinqin təhvil verməli olduğu iki binadandır.
pia.az