"Hər şey plana uyğun gedərsə, gələn ilə qədər əvvəlki həyat tərzimizə qayıda bilərik"

Statistikaya görə, xəstələrin təxminən 80% -i COVID-19-u yüngül formada keçirir. Adətən məhz belə insanlar təlaşa düşərək, mümkün qədər tez və bəzən həkim təyinatı olmadan kompüter tomoqrafiyasından (KT) keçməyə çalışırlar.

Media.Az bu barədə Mərkəzi Gömrük Xəstəxanasının radioloq həkimi Emin Məmmədovla danışıb.

- Nə vaxtdan pandemiya xəstəxanasında işləyirsiniz?

- Keçən ilin mart ayından bəri. Oktyabr-noyabr aylarında qısa bir fasilə oldu, sonra xəstəxana yenidən pandemik müəssisəyə çevrildi.

- Bu müddət ərzində xəstəliyin gedişində hansı dəyişikliklər baş verib?

- Heç bir ciddi dəyişiklik qeydə alınmayıb. COVID-19-un klinik əlamətləri əvvəlki ilə eynidir. Bunlar boğaz, əzələ ağrısı, baş ağrısı və hərarətdir. Ağır hallarda təngnəfəslik görünə bilər. Saturasiya (qanda oksigen səviyyəsi) 90% -dən aşağı olarsa, həmin şəxs xəstəxanaya yerləşdirilməlidir.

- Vətəndaşlarımız infeksiya barədə öyrəndikdən sonra dərhal KT-yə yazılırlar. Əslində bu, hansı hallarda lazımdır?

- Pasiyentdə xəstəliyin klinik əlamətləri olduqda, PZR testindən isə mənfi cavab çıxdıqda diaqnozu aydınlaşdırmaq üçün kompüter tomoqrafiyası aparmaq lazımdır.

Kompüter tomoqrafiyası ağciyər zədələnməsi göstəribsə, şəxsdə COVID-19 virusu aşkarlanıb. PZR testinin mənfi cavabı virusun yuxarı tənəffüs yollarından birbaşa ağciyərlərə keçməsindən qaynaqlana bilər.

- Əgər testdən müsbət cavab çıxsa və klinik simptomlar varsa, o vaxt da KT müayinəsi aparılmalıdırmı?

- Kompüter tomoqrafiyası ağciyər zədələnməsinin dərəcəsini aydınlaşdırmaq üçün aparılır. Ancaq koronavirus üçün test nəticəsi müsbətdirsə, deməli, virus artıq bədənə daxil olmuşdur. Dərhal müalicəyə başlamaq lazımdır. Vəziyyət pisləşməyə başlayırsa, temperatur düşmürsə, ağciyərlərin neçə faizinə təsir etdiyini anlamaq üçün KT müayinəsindən keçmək lazımdır.

- KT üçün əks göstərişlər hansılardır?

- Kompüter tomoqrafiyası üçün mütləq əks göstəriş hamiləlikdir. Ancaq müstəsna hallarda KT hamiləlik dövründə də aparılır.

- KT hansı intensivliklə edilə bilər?

- Planlı müayinə ilə fasilə altı aydır. Ancaq ehtiyac olarsa, iki həftədə bir həyata keçirilə bilər.

- Vaksinasiyaya münasibətiniz necədir? Hər şey qaydasında olsa, pandemiyanı nə vaxt məğlub edə bilərik?

- Vaksinasiyaya münasibətim müsbətdir. Virusdan qurtulmağın yeganə yolu budur. COVID-19-a birlikdə qalib gəlmək üçün hamını vaksinasiyaya çağırıram. Hər şey plana uyğun gedərsə, gələn ilə qədər əvvəlki həyat tərzimizə qayıda bilərik.

pia.az