Ermənistanın baş naziri Nikol Paşinyanın yerinə müxalifətdən vahid namizəd, ölkənin keçmiş baş naziri və müdafiə naziri Vazgen Manukyan ola bilər.
“Report” xarici mətbuata istinadən xəbər verir ki, bu barədə "Vətən" Partiyasının idarə heyətinin üzvü Robert Arutunyan bildirib.
"Vazqen Manukyan Ermənistanın keçid hökumətinin baş naziri vəzifəsinə vahid namizəd olacaq", - o deyib.
Manukyan 27 oktyabrda, Dağlıq Qarabağda müharibənin başlanmasından 1 ay sonra, hökuməti istefaya getməyə və hakimiyyəti orduya verməyə çağırıb.
***
Ermənistan müxalifəti dekabrın 3-də keçiriləcək mitinq zamanı ölkənin baş naziri vəzifəsinə öz namizədinin adını açıqlamağa söz verib.
“Report” "Sputnik Armenia”ya istinadən xəbər verir ki, bu barədə "Daşnaksutyun" partiyasının nümayəndəsi Arsvik Minasyan bildirib.
"Sabah böyük mitinqin gedişatında biz fəaliyyətimizi elan edəcəyik və baş nazir vəzifəsinə namizədi açıqlayacağıq", - Minasyan deyib.
Onun fikrincə, baş nazir Nikol Paşinyan nəyin bahasına olursa-olsun, hakimiyyəti əldə saxlamaq istəyir.
"Konstitusiya üsulu ilə xainin yerdəyişməsi üzrə addımlara başlamaq qaldı", - Minasyan bildirib.
Qeyd edək ki, bu gün Yerevanın mərkəzində müxalifətin yürüşü keçirilib. Aksiya iştirakçıları hökumət binasına yaxınlaşıblar. Aksiyada "Daşnaksutyun"dan başqa "Vətən" və "Çiçəklənən Ermənistan" partiyalarının üzvləri də iştirak ediblər.
pia.az