Xəbər verdiyimiz kimi, səhər saatlarından etibarən düşmən cəbhənin müxtəlif istiqamətlərində ordumuzun mövqelərini atəşə tutub.
Müdafiə Nazirliyinin yaydığı rəsmi məlumata görə, cəbhənin bütün istiqamətlərində əks-hücum əməliyyatlarına başlanılıb.
Bir neçə saat əvvəl verilən rəsmi məlumata görə Füzulinin Qaraxanbəyli, Qərvənd, Kənd Horadiz, Yuxarı Əbdürrəhmanlı, Cəbrayıl rayonunun Böyük Mərcanlı və Nüzgar kəndləri azad edilib. Ağdərə rayonu istiqamətində Murovdağı silsiləsində yerləşən bir neçə postlar dağıdılaraq, yüksəkliklər geri alınıb.
"Yeni Müsavat" Media Qrupunun Füzuli rayonuna ezam olunan reportyorları xəbər verir ki, hazırda rayona giriş tam nəzarət altındadır.
Polis əməkdaşları Füzuli rayon qeydiyyatı olmayan heç bir şəxsi rayona buraxmır. Rayon girişində ətraf qəsəbələrdən, rayonlardan, kəndlərdən axın var. İnsanlar dəstək üçün cəbhə bölgələrinə axın edir.
Hazırda Füzuli istiqamətində güclü atışma gedir. Azərbaycan ordusu düşmən mövqelərini intensiv atəşə tutur.
Rayon ərazisində yol kənarlarında minlərlə insan toplaşıb. Onlar əllərində bayraqlarla orduya, əsgərə dəstəklərini göstərirlər.
Füzuli və Beyləqan rayonları ərazisində hazırda böyük insan qrupları var və onlar cəbhə istiqamətindən gələnlərdən müjdəli xəbərlər gözləyirlərr. Polis əməkdaşları rayonun bütün ərazilərində nəzarəti həyata keçirir.
pia.az