Cümə, 29 Mart 2024
USD : 1.7
EUR : 1.8724
Hava
+25 ° Baku
+18 ° Quba
+17 ° Qusar
+22 ° Gəncə
+27 ° Lənkəran
+32 ° Naxçıvan
+30 ° Salyan
+19 ° Şəki

Eldar Həsənovdan sonra səfirlər xaricdən sığınacaq istəyə bilərlərmi? 

Azərbaycanın Serbiya Respublikasında, Monteneqroda, Bosniya və Hersoqovinadakı səfiri Eldar Həsənov şübhəli şəxs qismində tutulub. Məlumatı Dövlət Təhlükəsizlik Xidməti (DTX) yayıb. DTX-nın məlumatında deyilir ki, Xarici İşlər Nazirliyində maliyyə yoxlamaları ilə bağlı istintaq gedir və Eldar Həsənovun xeyli miqdarda büdcə vəsaitinin təyinatı üzrə istifadə edilməməsi və digər qanun pozuntularının törədilməsinə dair əsaslı şübhələr müəyyən edilib. Eldar Həsənov bir neçə gün idi ki, Azərbaycandadır. O, Azərbaycana rəsmi səfərə gəlmiş Serbiyanın Baş Nazirinin müavini, Milli Təhlükəsizlik Şurasının katibi və Daxili İşlər naziri Neboyşa Stepanoviçi müşayiət edirdi. DTX bundan əvvəl Xarici İşlər Nazirliyinin bəzi vəzifəli şəxslərini həbs edib. Onların arasında Xarici İşlər Nazirliyinin İşlər idarəsinin müdiri, Nazirliyin Tender Komissiyasının sədri Fərhad Molla-zadə, Konsulluq idarəsinin rəisi Faiq Bağırov var. Barələrində həbs qətimkan tədbiri seçilmiş şəxslər vəzifə səlahiyyətindən sui-istifadəetmə, mənimsəmə, rüşvət almaqda ittiham olunurlar. XİN və strukturlarında gerçəkləşən həbslər, aparılan yoxlamalar davam edir. Belə xəbərlər var ki, bir neçə səfir və konsulun geri çağırılması, həbs məsələləri də gündəmdədir. Bəs bu olanlardan, xüsusilə də Eldar Həsənovun həbsindən sonra səfirlər və digər diplomatik şəxslər kütləvi şəkildə xaricdən sığınacaq istəyə bilərlərmi?

Deputat Fazil Mustafa “Yeni Müsavat”a deyib ki, səfirlərin, konsulların istintaqdan gizlənmək üçün ölkəyə gəlməməsi deyə bir şey yoxdur:

“Amma kimlər ki, hər hansı bir qanunazidd əməl törədiblər, onlarla bağlı addımlar atıla bilər. Xarici İşlər Nazirliyində, səfirliklərmizdə kifayət qədər professional, öz işini bilən, öz işinə vicdanla yanaşan işçilər var. Kimlər günahkardırsa, təbii ki, məsuliyyətə cəlb olunmalıdırlar”.

Fazil Musatafa

Fazil Mustafa deyir ki, xüsusən də diplomatların barələrində konkret fakt olmadan istintaqa cəlb edilmələri mümkün deyil: “Bu adamlar toxunulmazlığı olan şəxslərdir. Bu məsələlərdə müvafiq dövlət orqanları fərqli taktika seçirlər. Dövlət orqanlarının bu kateqoriyadan olan şəxslərin həbsinə əllərində fakt olmadan getmələri inandırıcı görünmür”.

Fazil Mustafa həbs olunan səfir Eldar Həsənova və digər XİN rəsmilərinə verilən ittihamların təsdiqlənib-təsdiqlənməyəcəyi haqda suala belə cavab verib:

“İndiki halda Xarici İşlər Nazirliyinin yarıtmaz fəaliyyətinin müəyyən detalları ortadadır. Ona görə də bu nazirliklə bağlı narahatlıqlar cəmiyyətdə qalır. Amma bütün diplomatların hədəfə götürülməsi yanlışdır. Azərbaycanın kifayət qədər hazırlıqlı, vicdanlı diplomatları var”.

Deputat rüşvət və korrupsiyadan istifadə etməklə səfir təyinatı məsələlərinin də araşdırılmasının vacibliyini vurğulayıb: “Harda ki, rüşvət və korrupsiya var, səfirin bu istiqamətdə fəaliyyəti var, əlbəttə ki, bu məsələ mütləq şəkildə araşdırılmalıdır”.

Deputat Elman Nəsirov mövzu ilə bağlı Müsavat.com-a bildirib ki, bu gün baş verən məsələlərə qətiyyən təəccüblənmək lazım deyil: “Ölkə prezidenti cənab İlham Əliyev son dövrlərdə məmurlara dəfələrlə xəbərdarlıq edib ki, xalqa ləyaqətlə xidmət etmək lazımdır. Bu gün 5 icra başçısı həbsdədir, 2 nazir – mədəniyyət və xarici işlər nazirləri işdən çıxarılıblar. Onların rəhbərlik etdikləri nazirliklərdə həbslər həyata keçirilib. Eyni zamanda Azərbaycan Respublikasının Serbiya, Bosniya, Hersoqovina və Monteneqrodakı səfiri Eldar Həsənov həbsə alınıb. Cənab prezident son çıxışlarının birində məhz diplomatik fəaliyyət sahəsi ilə bağlı danışarkən qeyd etdi ki, müəyyən şübhələrimiz var. Xarici ölkələrdəki nümayəndəliklərdə xidmət edən şəxslərin fəaliyyətində Azərbaycan əleyhinə nüanslar haqda informasiyaya malikik və araşdırmalar aparılır. Müəyyən şübhələr var. 2015-ci ildə Arif Məmmədovun Azərbaycan dövlətçiliyi əleyhinə davranışı, antiAzərbaycançı dairələrin yanında yer alması faktı da bəlli idi. Bu istiqamətdə daxil olmuş siqnallar əsasında araşdırmalar aparılıb. Hazırda Dövlət Təhlükəsizliyi Xidmətinin saxladığı Eldar Həsənovla bağlı da qeyd olunur ki, iri həcmdə dövlət vəsaitlərinin mənimsənilməsi, iqtisadi sahədə cinayət faktları üzə çıxıb. İstintaq gedir və digər istiqamətlər üzrə də digər məqamlar ortaya çıxa bilər”.

Elman Nəsirov

Deputatın fikrincə, Azərbaycan diplomatlarından xarici ölkələrdə qalmaq yolunu tutanlar olarsa, bu avtomatik olaraq həmin şəxslərin fəaliyyətində Azərbaycanın milli maraqlarına zidd məqamların olduğuna əsaslı şübhələr yaradacaq: “Səfir, səfirlik işçisi ölkəyə qayıtmaq istəmirsə, deməli, hansısa hüquqazidd əməli var. Cənab prezident dəfələrlə vurğulayıb ki, hər kəs qanun qarşısında bərabərdir və kimliyindən asılı olmayaraq fəaliyyətində cinayət tərkibi olan istənilən şəxs – istəyir nazir olsun, istəyir səfir olsun, icra başçısı olsun - həbs olunacaq, qanun qarşısında cavab verəcək. Azərbaycanda cəzasızlıq rejimi ola bilməz”.

Deputat deyir ki, Azərbaycan hüquqi dövlətdir və yekun qərarı məhkəmə qəbul edir: “İndiki halda kimlər saxlanılıbsa, onlarla bağlı müəyyən şübhələr var, bu və ya digər məsələdə təqsirli hesab olunurlar. Ancaq yenə də yekun sözü məhkəmə deyəcək”.

Səfir Eldar Həsənovun korrupsiyaya görə həbs edilməsi fonunda işdən çıxarılmış xarici işlər naziri Elmar Məmmədyarovun eyni əməllərə görə azadlıqda qalmasına münasibət bildirən deputat deyib ki, hazırda istintaq gedir: “Proses davam edir, yekunlaşmayıb ki, işdən çıxarılan xarici işlər naziri ilə bağlı qərar verilsin. İstintaq yekunlaşmayıb ki, kimlərinsə istintaqdan kənar qalması, əməllərinə görə adekvat cəza almaması qənaəti qətiləşsin. Prosesin yekununda hər kəsin əməlinə uyğun qərar veriləcək. Qanun qarşısında kimsənin xüsusi imtiyazı yoxdur. Ona görə də tələsməyək”.

Eldar Həsənov

Elman Nəsirov deyir ki, pul, rüşvət qarşılığında XİN xətti ilə vəzifələrə təyinat, səfir göndərilmə məsələlərinin həllini mətbuatdan oxuyub: “Azərbaycanın 57 ölkədə səfirliyi var və həmin səfirliklərdə kifayət qədər savadlı, bacarıqlı diplomatlarımız çalışır. Onlardan bəzilərinin qeyri-adekvat davranışı və Azərbaycanın milli maraqlarına zidd davranışı bütövlükdə Xarici İşlər Nazirliyinin, diplomatik korpusun, diplomatlarımızın üzərinə kölgə salmamalıdır. Hansısa səfirin rüşvət müqabilində təyinatı ola bilər. Amma bütövlükdə bu məqamı bütün səfirlərə şamil etmək düzgün deyil. Bəli, mətbuatdan 1 milyon dollara səfir təyinatını oxumuşuq, amma təsdiq olmalıdır. Bu faktlar, versiyalar araşdırılmalıdır. 1 səfir haqda belə xəbər varsa, qalan 56 səfiri ittiham etmək olmaz”.

Elmar Məmmədyarovun fəaliyyətinin yarıtmazlığı, XİN-də rüşvət və korrupsiya mexanizmlərinin işlək olması haqda xəbərlər DTX əməliyyatlarından öncə mətbuatda vardı və bu məlumatlar baş tutan antikorrupsiya əməliyyatları ilə təsdiqini tapdı. Elman Nəsirov deyir ki, mətbuatda yer alan məlumatlar araşdırılır, müvafiq addımlar atılır: “Mətbuatda yer alan məsələlərə müvafiq hüquq mühafizə orqanları reaksiya verirlər. Xarici işlər nazirinin işdən uzaqlaşdırılması rəhbəri olduğu qurumda baş verən neqativ hadisələrlə bağlı oldu. Xarici işlər nazirinin istintaqa cəlb olunması, perspektivdə həbsi məhkəmənin qərarından asılı olacaq. Bu qərar təkzibedilməz faktlara söykənməlidir. Heç bir şəxs məsuliyyətdən kənar qala bilməz. Heç kimin toxunulmazlığı yoxdur, cənab prezident dəfələrlə bunu söyləyib. Bu baxımdan narahatlığa əsas görmürəm. DTX-nın son əməliyyatları da göstərdi ki, ölkəmizdə neqativ hallar – korrupsiya və rüşvətxorluğa qarşı, sui-istifadə hallarına qarşı çox ciddi tədbirlər görülür”.

Deputat deyir ki, XİN-in digər dövlət strukturlarında baş verənlərlə bağlı oxşar cəhətləri ilə yanaşı fərqli tərəfləri də var: “Xarici İşlər Nazirliyində görülən tədbirlərin özəllikləri də var. Çünki Xarici İşlər Nazirliyində başqa qurumlardakı dövlət vəsaitlərinin mənimsənilməsi, korrupsiya ilə yanaşı XİN strukturlarında işləyən şəxslərin xariclə də bağlı müəyyən bağlantıları olur. Təbii ki bu əlaqələr Azərbaycan dövlətinin milli mənafelərinin qorunması baxımından gerçəkləşir. Ancaq qorunmayacağı, kölgə salacağı, milli maraqların ziddinə gedəcəyi təqdirdə təbii ki, xəyanət kimi qiymətləndiriləcək. Ona görə də hər bir məqam araşdırıldıqdan, sübutlarla bərkidildikdən sonra  məhkəmənin qərarı ilə müvafiq addımlar atılır. Yaxın zamanlarda çox ciddi addımların atılacağına şahidlik edəcəyik”.

pia.az 


Etiket: Səfir


Digərxəbərlər

General Mövlam Şıxəliyevin 2 milyondan çox əmlakı özünə qaytarıldı - Siyahı

Putinin ilhaq və səfərbərlik qərarı - Bundan sonra müharibənin taleyində hansı faktorlar əsas rol oynayacaq?

Populyar xəbərlər

Azərbaycanda polkovnik-leytenant vəfat etdi - Foto

Ermənistan Silahlı Qüvvələrinin Baş Qərargah rəisi müharibə istəyir?..

Yarım milyon mənimsəyən baş həkim həbsdə öldü    

Şadlıq saraylarında menyular bahalaşdı - Qiymətlər

“Verdiyi koordinatlar o qədər dəqiq idi ki...” - Döyüş yoldaşları Milli Qəhrəman haqqında - Video

BMT Baş katibi azərbaycanlı diplomatı yüksək vəzifəyə təyin edib

Azərbaycanda taksilərdə gediş haqqı lövhəsinin nümunəvi forması açıqlanıb

Ən çox oxunanalar