İyulun 12-dən başlayaraq Tovuz istiqamətində davam edən erməni təxribat nəticəsində 12 hərbçimizi şəhid vermişik.
Onlardan çavuş Vüqar Sadıqov, baş əsgər Elşad Məmmədov və əsgər Xəyyam Daşdəmirovun qəhrəmancasına şəhid olmasından 7 gün keçir.
"Yeni Müsavat" Media Qrupunun Tovuz rayonuna ezam olunan reportyorları xəbər verir ki, bu gün şəhidlərin yeddi mərasimi təşkil olunacaq. Mərasimlərdə dövlət rəsmilərinin iştirakı da gözlənilir.
Əməkdaşlarımız həmçinin məlumat verir ki, son sutka ərzində Tovuzun ermənilərlə sərhəd bölgəsində yerləşən kəndləri istiqamətində tam sakitlik olub.
Xatırladaq ki, iyulun 12-dən davam edən erməni təxribatı nəticəsində növbəti günlərdə Azərbaycan ordusunun digər hərbçiləri general-mayoru Polad Həşimov, polkovnik İlqar Mirzəyev, mayor Namiq Əhmədov, mayor Anar Novruzov, gizir İlqar Zeynallı, gizir Yaşar Babayev, müddətdən artıq həqiqi hərbi xidmət hərbi qulluqçusu əsgər Elçin Mustafazadə, müddətdən artıq həqiqi hərbi xidmət hərbi qulluqçusu əsgər Nazim İsmayılov da qəhrəmancasına şəhid olublar.
Ermənilərin fərdi yaşayış evlərini atəşə tutması nəticəsində isə Ağdam kənd sakini 76 yaşlı Əziz Əzizov da şəhid olub. (Musavat.com)