General-mayor Polad Həşimov dəfn olundu - Yenilənib+Video

Azərbaycan Ordusunun şəhid olan general-mayoru Polad Həşimov və polkovnik İlqar Mirzəyev İkinci Fəxri xiyabanda dəfn olunub.

Çox sayda insanın qatıldığı dəfn mərasimində dövlət himni səsləndirilib və havaya yaylım atəşi açılıb.

Saat 09:30
Azərbaycan Ordusunun şəhid olan general-mayoru Polad Həşimovun dəfn mərasimi başlayıb. 

Onun cənazəsi torpağa tapşırılmaq üçün İkinci Fəxri xiyabana gətirilib. Mərasim yaylım atəşi altında baş tutub.

Dəfn mərasimində generalın yaxınları ilə yanaşı Prezident Administrasiyasının nümayəndələri, Müdafiə Nazirliyinin, Səfərbərlik və Hərbi Xidmətə Çağırış üzrə Dövlət Xidmətinin, hüquq-mühafizə orqanlarının əməkdaşları, ictimaiyyət nümayəndələri də iştirak edir.

Saat 08:47
Bu gün Azərbaycan daha iki şəhidi ilə vidalaşacaq.

"BakuPost"un məlumatına görə, iyulun 13-dən 14-ə keçən gecə Tovuz rayonu ərazisində gedən şiddətli döyüşlərdə şəhid olan Azərbaycan Ordusunun general-mayoru Polad Həşimovun nəşi doğulduğu Qəbələ rayonundan yaşadığı Sumqayıta gətirilib. Şəhidin cənazəsi Sumqayıtda gecə saatları olmasına baxmayaraq böyük çoşğu ilə qarşılanıb. Minlərlə insan əlində bayraqlarla, Qarabağ şüarları ilə onun yaşadığı binanın qarşısına toplaşıb.

General-mayor Polad Həşimovun cənazəsi İkinci Fəxri xiyabanda torpağa tapşırılacaq.Bu gün həmçinin eyni istiqamətdə gedən döyüşlərdə şəhid olan polkovnik İlqar Mirzəyevin də dəfn mərasimi baş tutacaq. Onun da nəşinin paytaxtda gətirilməsi böyük izdihamla müşahidə olunmuşdu.

pia.az