Azərbaycanın şimal zonasında müşahidə olunan isti külək kənd təsərrüfatına ciddi ziyan vurub...
PİA.az xəbər verir ki, Şabran rayonunun kəndlərində meyvə bağları və tərəvəz sahələri sıradan çıxıb.
Şabran sakinlərinin sözlərinə görə, külək ağacların budaqlarını sındırıb, yetişmiş meyvələri qopararaq yerə töküb. Rayonun Pirəmsən kəndində gilas bağları yararsız hala düşüb. Kəndlilər neçə aydır qulluq etdikləri meyvə bağlarından gözlədikləri qədər məhsul götürə bilmirlər: “Mövsümi meyvələr, xüsusən də gilas, albalı bağları viran qalıb. Külək ağacların budaqlarını qırıb yerə töküb, meyvələri qopardıb. Meyvələrin ağacda qalanı da elə vəziyyətdədir ki, nə satmaq olur, nə də atmaq. İsti külək tərəvəzlərin yarpaqlarını da yandırıb xəzələ döndərib. Pomidor, badımcan, xiyar və digər tərəvəzlər tağda quruyublar”, - Zülfiyyə Şirinova deyir.
Sakinlər bildirirlər ki, bu il meyvənin bol olması gözlənilsə də, ağacların gül açan vaxtı yağan fasiləsiz yağışlar onların tökülməsinə səbəb olmuşdu. Meyvələrin qalanını isə külək zay edib.
Rayonun Ərəblər kəndində də küləyin fəsadları müşahidə olunur. Kənd sakini B.Məmmədova deyir ki, ağaclar aşıb, yetişmiş meyvələr yerə tökülüb. Ən çox zərər yeni salınmış gilas bağlarına dəyib: “Təxminən 4 gün dəhşətli külək oldu, növbəti 3 gün ərzində isə nisbətən zəiflədi. Yeni salınmış bağlarda bir və iki illik ağac tinglərinə xeyli ziyan dəyib. Kiçik ağacların budaqları sınıb tökülüb, ağaclar yararsız hala düşüb. Ağacların yeni çıxan yarpaqları yanıb. Alma və fındıq bağları da zərərsiz ötüşməyib”.
Bağ sahiblərinin sözlərinə görə, külək yeni salınan bağlarda fermerlərə 200-300, bəhərə düşən bağlarda isə 1500-2000 manatadək ziyan vurub.
pia.az