Qarabağ qazisi vəfat etdi

PİA.az-ın xəbərinə görə, bu barədə deputat Vüqar Bayramov məlumat verib.

“Vətənimizin bütövlüyünün qorunması yolunda sağlamlığını qurban vermiş I qrup Qarabağ qazisi Vəkil Musayevin ölüm xəbəri məni dərindən sarsıtdı. Bakıda 1 saylı Kliniki Tibbi Mərkəzdə müalicə olunarkən səhhəti ilə bağlı müzakirə aparmışdım. O vaxt həkimlər müalicəsinin müvəqqəti olaraq evdə davam etdirilməsini məsələhət görmüşdülər, o səbəbdən tezliklə rayonda, doğma Böyük Bəhmənlidə görüşməyi planlaşdırırdıq. Təəssüf ki, qlobal pandemiya ilə bağlı sosial təcridin tətbiqi və əhalinin sağlamlığının qorunması məqsədilə dövlət tərəfindən həyata keçirilən tədbirlər səbəbindən seçicilərlə görüşlərimiz və səfərlərimiz təxirə salındı. Özü və yaxınları ilə telefon əlaqəsi saxlayır, Böyük Bəhmənlidə görüşməyi planlaşdırırdıq. Olmadı, vaxtsız əcəl qəlbi Vətən eşqi ilə döyünən qəhrəmanımızın ömrünü yarıda, arzularını ürəyində qoydu. Məkanın cənnət, yerin behiştdir, Vətənin mərd oğlu, Allahdan sənə rəhmət, xalqımıza, doğmalarına səbr diləyirəm!” – V.Bayramov deyib.(Pravda.az)

pia.az