"Azərbaycan xalqını bir daha əmin etmək istəyirəm ki, nə qədər, Orxan kimi balalarımız var, bir qarış torpaqlarımız belə heç zaman düşmən tapdağı altında qalmayacaq"...
"Report"un Muğan bürosunun məlumatına görə, bu sözləri şəhid Orxan Paşazadənin atası Nazim Paşazadə jurnalistlərə açıqlamasında deyib.
"Mənim balam son damla qanına qədər vuruşdu və düşmənləri geri çəkilməyə məcbur etdi. Oğlum Vətən yolunda qurban getdi. Ona görə də, fəxr edirəm ki, mən şəhid atasıyam", - şəhid atası vurğulayıb.
Qeyd edək ki, şəhidin atası Nazim Paşazadə Cəlilabad rayonunun Cəfərxanlı kənd orta məktəbində tarix müəllimi işləyir.
Xatırladaq ki, martın 5-də saat 19:10 radələrində Ermənistan silahlı qüvvələrinin bölmələri tərəfindən Azərbaycan-Ermənistan dövlət sərhədindəki təmas xəttində atəşkəs rejimi kobud surətdə pozulub.
Düşmən snayperi tərəfindən açılan atəş nəticəsində Qazax rayonunun Quşçu Ayrım kəndi yaxınlığındakı sərhəd döyüş məntəqəsində xidmətdə olan sərhədçi əsgər, 1996-cı il təvəllüdlü Paşazadə Orxan Nazim oğlu yaralanıb. Əsgər dərhal Qazax rayonunun diaqnostika mərkəzinə təxliyə edilsə də, həyatını xilas etmək mümkün olmayıb.
Şəhid Cəlilabad rayonunun Cəfərxanlı kəndində yerləşən qəbiristanlıqda torpağa tapşırılıb. Dəfn mərasimində şəhidin ailə üzvləri, Dövlət Sərhəd Xidmətinin nümayəndələri, Cəlilabad Rayon İcra Hakimiyyətinin rəhbərliyi, Səfərbərlik və Hərbi Xidmətə Çağırış üzrə Dövlət Xidmətinin Cəlilabad rayon şöbəsinin əməkdaşları, rayon sakinləri və ictimaiyyət nümayəndələri iştirak ediblər.
O.Paşazadə "Hərbi xidmətdə fərqlənməyə görə" 3-cü dərəcəli medalla təltif edilib. Medal Dövlət Sərhəd Xidmətinin rəsmisi tərəfindən şəhidin bu gün keçirilən dəfn mərasimində atasına təqdim edilib.
pia.az
Digərxəbərlər
Populyar xəbərlər
