İqbal Ağazadə : “Heç nəyi tapdalamadım, vicdanım rahatdır”

“Dostluğun üzərindən mən keçmədim. Həmin şəxsdən 11 gün əvvəl namizədliyimi irəli sürmüşdüm, imza toplayıb, sənədləri dairə seçki komissiyasına təqdim etmişdim. 3 dəfə 35 saylı Xətai üçüncü seçki dairəsindən deputat seçilmişəm. Adam da bilir ki, mən oradayam. Namizədliyini məndən əvvəl irəli sürsəydi, bu addımı atmazdım. Mənə zəng edib deyə bilərdi ki, bu seçki dairəsini niyə seçib. Onun namizədliyini irəli sürməsini sosial şəbəkədən öyrəndim”.

PİA.az-ın xəbərinə görə, bunu nəticəsi ləğv edilən 35 saylı üçüncü seçki dairəsindən deputatlığa namizəd olmuş, Ümid Partiyasının sədri İqbal Ağazadə digər namizəd Rauf Arifoğlundan danışarkən deyib.

“Bu addım məni dünən incidirdi, bu gün incitmir. Situasiyalar insanların gerçəyini və mahiyyətini ortaya çıxarır. İnsanları situasiya dəyişdirmir, mahiyyət nədirsə, üzə çıxır... Keçmişə baxmıram, keçmiş olsun! Bəlkə də ikimizə də... Mən heç nəyi tapdalamadım, vicdanım rahatdır. Bir dəyəri pozmadım... Hətta seçkiqabağı təşviqat dövründə də barəmdə yazsalar da, bircə dəfə də o insanın adını çəkmədim. Təkrar seçkilərə qatıla bilər, həmin dairədən namizəd ola bilər. Mən də həmin dairə üzrə deputatlığa namizəd olacam. O, passiv seçki hüququndan istifadə edən vətəndaşlardan biridir” – İ.Ağazadə qeyd edib. (“Azadlıq radiosu”/video-müsahibə)

pia.az