Asim Mollazadə İsa Qəmbərin oğlu ilə debatdan niyə çəkinir?

PİA.az xəbər verir ki, 22 saylı Nəsimi ikinci seçki dairəsindən namizəd olan Asim Mollazadə həmin dairədən deputatlığa namizəd keçmiş Müsavat Partiyasının başqanı İsa Qəmbərin oğlu Turqut Qəmbərlə debatdan çəkinib. Bununla bağlı Turqut Qəmbər öz Feysbuk hesabında yazıb.

“Hakimiyyətin 22-ci dairədən namizədi Asim Mollazadə mənimlə debata çıxmaqdan imtina edib. Deyir ki, onun hesabına tanınmaq istəyirik. Asim Mollazadə 22-ci dairədə bir azca təbliğat aparsaydı, vətəndaşlarla söhbət etsəydi, bilərdi ki, onun reytinqi yerlərdədir. Vətəndaşların ona səs verməyəcəyi birmənalıdır. Apardığımız təbliğat və vətəndaşlardan gördüyümüz xoş münasibət göstərir ki, səslərin çoxunu qazanmaq tam realdır. Əsas məsələ daha çox seçicini seçkiyə gətirməkdir”.

Qeyd edək ki, son 4 çağırış Milli Məclisin (MM) üzvü olan A. Mollazadə 2005-ci ildən, 3-cü çağırışdan həmin dairəni parlamentdə təmsil edir.

O, 5-ci dəfə seçkilərə qatılıb, MM-in Elm və təhsil, Beynəlxalq münasibətlər və parlamentlərarası əlaqələr komitələrinin üzvüdür.

Azərbaycanın AŞPA-dakı nümayəndə heyətinin üzvü, Demokratik İslahatlar Partiyasının (DİP) sədridir.

pia.az