5 ildə 2 milyardlıq artım - 2020-ci ildə Azərbaycanda çox şey dəyişəcək

Bu barədə “Yeni Sabah”a açıqlama verən təhsil eksperti Kamran Əsədov deyib ki, 2020-ci ildə ölkəmizdə təhsilin inkişafı kəskin şəkildə yüksələ bilər:

“Mən onu deyim ki, son 5 il ərzində dövlət büdcəsindən təhsilə ayrılan vəsait kəskin şəkildə artıb. Yəni, əgər bu vəsait 2015-ci ildə 1 milyard 400 milyon manat üzərində idisə, artıq 3 milyarddır. Nəzərinizə çatdırım ki, Azərbaycanda təkcə təhsilə ayrılmış büdcə 2 qonşu dövlətin yəni, Ermənistanın və Gürcüstanın ümumi büdcəsindən çoxdur. Azərbaycan Prezidentinin siyasəti ondan ibarətdir ki, ölkəmizdə təhsil inkişaf etməlidir, dünayada rəqabətə davamlı iqtisadiyyat formalaşmalıdır".

Ekspert bu vəsaitin haralara xərclənəcəyini də izah edib:

"Ölkədə təhsil büdcəsinin bu qədər artırılması müəllimlərin sosial vəziyyətinin yaxşılaşdırılmasına, tələbələrin təqaüdünün artırılmasına, elmi tədqiqat işlərinin artmasına yönləndiriləcək. Ona görə ki, burda əmək bazarının tələblərinə cavab verən kadrların hazırlanması orta ixtisas, peşə ixtisas müəssisələrində həyata keçirilir. Azərbaycanda təhsil müəssisələrinin beynəlxalq rəqabətinin artmasına diqqət ayırmaq lazımdır. Eyi zamanda bəzi rayonlarımızda mövcud olan qəzalı vəziyyətli məktəblərin təmirinə, dərslik siyasətinin yenidən qurulmasına diqqət ayırılmalıdır. Mən düşünürəm ki, 2020-ci ildə yeni Azərbaycan təhsili görəcəyik. Büdcənin belə kəskin artması Prezidentin təhsilə olan diqqətini göstərir. Beynəlxalq aləmdə elmi tədqiqat işləri genişlənəcək. Elm sahəsində vacib olan informaiyaları dünyaya çatırılmasında işlər görüləcək. Ölkədə ən çox artım təhsil sahəsindədir. Düşünürəm ki, ali təhsil müəssisələri keyfiyyətli kadr hazırlığana başlayacaq”.

pia.az