Selcan Yağmur: “Fuad Qəhrəmanlını hakimiyyətin əliylə cəzalandırmaq, qatili öldürtməyə oxşayır...”
Fuad Qəhrəmanlının qızı Selcan Yağmur atasına qarşı cinayət işi açılmasına münasibət bildirib. “Facebook” sosial şəbəkəsində atasına qarşı açılan cinayət işində şikayətçi olmadıqlarını bildirib. PİA.az Selcan Yağmurun statusunu oxucularının diqqətinə təqdim edir:
“Fuad Qəhrəmanlını hakimiyyətin əliylə cəzalandırmaq, qatili öldürtməyə oxşayır. Azərbaycanda hər hansı bir dövlət qurumununa inamım olsaydı, başdan ədaləti polis bölməsində axtarardım onsuz da. Biz şikayətçi filan da olmamışıq. Gedin kənarda oynayın lütfən. İki tərəf də eyni şəkildə çirklidir və o çirkə mənimlə ailəmin bir aidiyyatı yoxdur artıq”.
Qeyd edək ki, bu gün Azərbaycan Respublikasının Baş Prokurorluğu tərəfindən Cinayət Məcəlləsinin 133.2.1 (iki və ya daha çox şəxsə qarşı döyməklə və ya sair zorakı hərəkətlərlə güclü fiziki ağrı və ya psixi iztirablar vermə) və 133.2.4-cü (təqsirkar şəxs üçün aşkar surətdə yetkinlik yaşına çatmayan, habelə köməksiz vəziyyətdə olan şəxsə qarşı döyməklə və ya sair zorakı hərəkətlərlə güclü fiziki ağrı və ya psixi iztirablar vermə) maddələri ilə cinayət işi başlanılması ilə bağlı rəsmi məlumat yayımlanıb. Cinayətin xarakteri, işin xüsusiyyətləri və hadisələrin Abşeron rayonunun ərazisində baş verməsi nəzərə alınaraq cinayət işinin istintaqı Abşeron rayon prokurorluğuna həvalə edilib.
Hazırda iş üzrə zəruri istintaq-əməliyyat tədbirləri davam etdirilir.
pia.az