“Putinin reklamı fontan vurur”- Azər Rəşidoğlundan İlham Rəhimova və mətbuata qınaq

Siyasi şərhçi, tanınmış jurnalist Azər Rəşidoğlu facebook səhvəsində İlham Rəhimovun mətbuatımızda yayımlanan müsahibəsi haqqında status yazıb.

PİA.az həmin statusu olduğu kimi təqdim edir:

“Bir qədər uzun olsa da, oxumağınız məsləhətdir!

Azərbaycanın prezidenti İlham Əliyevdir. Onun siyasətini təbliğ və yaxud tənqid edə bilərik. Lakin dövlətin başçısı odur. Heç bir qonşu ölkənin, nə Rusiyanın, nə İranın, nə ABŞ-ın rəhbəri mənim üçün önəmli deyil. Artıq yad ölkənin prezidentinə "Mənim prezidentim" müraciəti olur.

Əgər söhbət Azərbaycanın qanlı və qaranlıq taleyi ilə bağlı olan böyük ölkənin, müstəqillimizə təhdid olan bir ölkənin prezidentindən gedirsə, bu artıq təhlükəsizlik məsələsinə çevrilir. Bir qədər öncə sosial şəbəkədə Putini tənqid etdiyimə görə əməkdaşlıq etdiyim (köşələrim dərc edilirdi) saytın rəhbəri açıq bəyan etdi - Putini tənqid edən biri, bu saytdan qonorar almayacaq və sizinlə əməkdaşlığa son qoyuruq. Ona dedim ki, mən öz prezidentimi, İlham Əliyevi də tənqid edirəm, buna görə heç kəs məni təhdid etmir, biz müstəqil ölkəyik, qonşu ölkənin prezidentiini tənqid etdiyim üçün məni işdən qovacaqsınız? Cavabı unikal oldu - Öz prezidentin haqqında nə istəyirsən yaz. Amma cənab Putin barəsində heç nə yazma! O sayt ilə əməkdaşlığımı dayandırmalı oldum.

Bunu niyə xatırladım. Hörmətli İlham Rəhimovun Putini bu dərəcədə reklam edən müsahibəsini əksər saytlar dərc edib. Putinin reklamı fontan vurur. Biri başı üzərindən Putinin portretini asır, digəri İran rəhbərinin, başqa biri Trampın, digəri Ərdoğanın. Azərbaycan müstəqil dövlətdir və nida işarəsi! Yapmayın belə. Qonşu ölkə nə qədər böyük olsa da, Azərbaycan mənim üçün daha böyükdür. Pafoslu səslənsə də, deyəcəm - yaşasın Azərbaycan! Xilasımız öz əlimizdədir. Böyük xalqıq. Köləcəsinə yad ölkələrin rəhbərlərinə yaltaqlanmayaq!”.

pia.az