Qarabağ Çempionlar liqası ilə vidalaşıb
«Qarabağ»ın Kipr klubu ilə cavab oyununa görünməmiş səbrlə baxdım. Çünki bu komanda mənim üçün çox doğmadır. Ona görə yox ki, mən ağdamlıyam. Həm də ona görə ki, bu komandanı uzun illər «dişimiz-dırnağımızla» saxlamışıq, cibimizin pulu ilə dolandırmışıq.
Ədalət naminə qeyd etməliyəm ki, o vaxtlar Ağdam yerində, «Qarabağ» da öz şakərində idi – pis oynamırdı və bizi indiki kimi məyus etmirdi. O vaxtlar komandanın büdcəsi demək olar təkcə oyuncuların əmək haqqından ibarət olardı – çox vaxt məşqçisi heç məvacib də almırdı…
İndi komandanın büdcəsi milyonlarla ölçülür, fəqət, oyunu 5 qəpiyə dəyməz! «Apoel»lə son görüş bunu açıq şəkildə ortaya qoydu.
Bizi naümid və rüsvay etdiniz! Ayıb olsun sizə (bu tənəni Rəşad Sadıqova aid etmirəm)!!! Dayandırın bu rüsvayçılığı – bir daha meydana bu sifətdə çıxmayın!!!
Əcnəbi oyunçuları buraxın getsinlər evlərinə – onlardan bizə silahdaş olmaz. Qoyun, ağdamlılar özləri oynasınlar. Eybi yox, gözləyərik – püxtələşərlər, oynayarlar, Ağdam da dəstək olar. Bizim də indi olduğu kimi, ürəyimizdən qara qanlar axmaz!!!
Qurbanov da özünə başqa bir iş tapar. Bilirəm o, prinsipial adamdır, nə yazıq ki, bu işdə təkcə prinsipiallıq yetərli deyil.
Gedin, qardaşlar, gedin – daha belə oynamayın!!! Bizi üzməyin…
Mirzə Ağ(Azpolitika.info)
Pia.az