MTRŞ müddətsiz lisenziyaların verilməsi ilə bağlı iddialara münasibət bildirib

MTRŞ-nin şöbə müdiri Nemət Cavadov açıqlama verib

Milli Televiziya və Radio Şurası (MTRŞ) teleradio yayımçılarına müddətsiz lisenziyaların verilməsi ilə bağlı səslənən iddialara münasibət bildirib.

MTRŞ-nin şöbə müdiri Nemət Cavadov ONA-ya bildirib ki, “Lisenziyalar və icazələr haqqında” qanunun 22.1 maddəsinə əsasən lisenziyalar, bu qanunun 2 nömrəli əlavəsinin 4-1-ci maddəsində nəzərdə tutulmuş fəaliyyət növünə verilən lisenziyalar istisna olmaqla müddətsiz verilir.

“Azərbaycan qanunlarında müddət müəyyən edilməyibsə, icazələr müddətsiz verilir. Həmin qanunun 1-ci maddəsində lisenziyaların və icazələrin anlayışları göstərilib. Yəni, lisenziyalar mobil yayım istisna olmaqla birmənalı olaraq müddətsiz verilir. İcazələr isə qanunlarda başqa müddət müəyyən edilməyibsə müddətsiz təqdim edilir. Teleradio yayımı fəaliyyəti lisenziya tələb olunan fəaliyyət növlərinə aid olduğundan qanunun 22.1-ci maddəsinə əsasən bu sahədə lisenziyalar müddətsiz verilir. Eyni zamanda, bildirmək istərdim ki, “Lisenziyalar və icazələr haqqında” qanun 15 mart 2016-cı il tarixində qəbul edilib. Normativ hüquqi aktlar haqqında Konstitusiya Qanununun 10.5-ci maddəsinə əsasən yeni normativ hüquqi akt eyni məsələ üzrə həmin dövlət orqanı tərəfindən əvvəllər qəbul edilmiş normativ hüquqi aktla münasibətdə daha yüksək hüquqi qüvvəyə malikdir”, - N. Cavadov qeyd edib.