Əlcəzairdə müvəqqəti prezident seçildi

Prezident vəzifələrinin müvəqqəti icraçısı üç ay ərzində ölkədə prezident seçkiləri təşkil etməli və keçirməlidir.

RİA Novosti-nin məlumatına görə, bu barədə aprelin 9-da ölkə parlamentinin aşağı palatası və Millətlər Şurası (yuxarı palata) nümayənədlərinin iştirakı ilə keçirilən geniş tərkibli xüsusi iclasda bəyanat verilib.

Daha əvvəl isə iclasda Əlcəzair parlamenti konstitusiyanın 102-ci maddəsinə əsasən prezident postunun boş qaldığını elan edib.

Qeyd edək ki, Əbdüləziz Buteflika konstitusiyanın 102-ci maddəsindən istifadə edərək, prezident postundan getmək istəməsi ilə bağlı Konstitusiya şurasınının sədrini məlumatlandırmışdı.

Həmin maddə prezident səhhəti ilə əlaqədar öz vəzifələrini yerinə yetirə bilmədiyi hallarda tətbiq olunur.

Virtualaz.org xatırladır ki, Əlcəzair prezidenti Əbdüləziz Buteflika aprelin 2-də istefa verib. 82 yaşlı Ə.Buteflika 1999-cu il aprelin 28-dən 2019-cu il aprelin 2-dək ölkəyə rəhbərlik edib. Bir neçə ildir xəstəlikdən əziyyət çəkən Ə.Buteflika yenidən prezidentliyə namizədliyini irəli sürmək istəyirdi. Onun bu qərarı ölkədə böyük narazılığa və etiraz aksiyalarına səbəb olmuşdu. Nəticədə Ə.Buteflika istefa verdi.

Əbdülqadir bin Salehi 1941-ci il noyabrın 24-də Əlcəzairin Fellausen şəhərində doğulub. 1997-2002-ci illərdə Milli Assambleyanın sədri olub. 2002-ci ildən Millət Şurasının sədridir.(virtualaz.org)

pia.az