Aprel döyüşləri millətin ürəyinin Qarabağ ilə bir vurduğunu dünyaya bir daha bəyan edərək, bütün xalqımızın hər an savaşa hazır olduğunu göstərdi
PİA.az Axar.az-a istinadən xəbər verir ki, bu sözləri Aprel döyüşlərinin ildönümü ilə bağlı danışan millət vəkili Hadı Rəcəbli deyib. Deputat qeyd edib ki, bu gün Aprel döyüşlərinin üzərindən üç il keçir və bu zəfər salnaməsinin başlanğıcı olan döyüşlər bir daha Azərbaycanın öz ərazilərini azad etməyə qadir olduğunu sübut etdi:
“Bu döyüşlər millətin ürəyinin Qarabağ ilə bir vurduğunu dünyaya bir daha bəyan edərək, bütün xalqımızın savaşa hər an hazır olduğunu göstərdi. Ölkə başçısının qətiyyətli fikirləri ilə səsləndirsək, deyə bilərik ki, Dağlıq Qarabağ Azərbaycanın ayrılmaz hissəsi kimi həmişə Azərbaycanın tərkibində olub, bu gün də onun tərkibindədir, gələcəkdə də olacaq. Zəfəri yazanların qarşısında baş əyirik!”
Millət vəkili Azər Badamov isə qeyd edib ki, düşmən üzərində əldə olunacaq tarixi qələbənin təməlini qoyan Aprel döyüşləri ermənilərin məğlubedilməz ordu mifini alt-üst etdi:
“Azərbaycan tarixinə qızıl hərflərlə yazılan Dördgünlük müharibə nəticəsində Füzuli, Cəbrayıl və Ağdərə rayonlarında 2 min hektardan çox torpağımız işğaldan azad olundu. Nəticədə işğaldan azad etdiyimiz yüksəkliklərdən Dağlıq Qarabağa nəzarət etmək imkanlarımız genişləndi. 2018-ci ilin mayın 21-dən 27-nə qədər ordumuzun həyata keçirdiyi Naxçıvan əməliyyatı nəticəsində azad olunmuş 11 min hektar torpaqlarımız məhz uğurlu Aprel döyüşlərinin davamı idi. Aprel döyüşləri düşmənə sübut etdi ki, öz doğma yurdlarından qaçqın və köçkün düşmüş soydaşlarımız Dağlıq Qarabağa qayıtmağa hazırdırlar, onlar sadəcə torpaqlarımızın işğaldan azad olunacağı zamanı gözləyirlər. Azərbaycan heç vaxt işğalla barışmayacaq. Hesab edirəm ki, keçirəcəyimiz növbəti hərbi əməliyyatlar torpaqlarımızın tam azad olunmasına səbəb olacaq”.
pia.az