Artıq iki gündür ki, İçərişəhərdə “Bahar festivalı” keçirilir
Novruz adət-ənənələrini təbliğ edən festivalda xarici ölkələrdən olan qonaqlar da iştirak edirlər. Xüsusilə də hər il olduğu kimi iranlılar bu il də qonaqlar arasında çoxluq təşkil edir.
Qoşa qala qapısı meydanında xalq-tətbiqi sənəti nümunələrinin və suvenirlərin satışı təşkil olunub. Eyni zamanda aşpazlar festivalın qonaqlarına milli mətbəximizin yeməklərinin, Novruz şirniyyatlarının – şəkərbura, paxlava və badamburanın dadına baxmağı təklif edirlər.
Qız qalası qarşısında da tədbirlər təşkil olunub. Kosa və keçəl qonaqlara müxtəlif növ şirniyyatlar paylayır.
Məlumat üçün bildirək ki, festival“İçərişəhər” Dövlət Tarix-Memarlıq Qoruğu İdarəsinin təşkilatçılığı ilə martın 26-dək davam edəcək. Festivalda ənənəvi olaraq təşkil edilən konsert proqramı hər gün saat 12:00-dan axşam saat 18:00-dək davam edəcək.
Bütün bu yeniliklərlə yanaşı, festival çərçivəsində martın 23-də Qoşa qala meydanında Türkiyənin gənc estrada ulduzu Aleyna Tilki konsert proqramı ilə çıxış edəcək.(musavat.com)
pia.az