Qida Təhlükəsizliyi Agentliyində 30-dan çox bazar tipli ticarət mərkəzinin rəhbəri ilə görüş keçirilib
Agentlikdən verilən məlumata görə, məqsəd bazar tipli ticarət mərkəzlərində qida təhlükəsizliyi nəzarətinin təkmilləşdirilməsidir.
Görüşdə sahibkarların diqqətinə çatdırılıb ki, Agentlik qida zəncirinin bütün mərhələlərində iştirak edən sahibkarlıq subyektlərinin fəaliyyətinə dövlət nəzarətini həyata keçirir. Bazar tipli ticarət mərkəzlərinin rəhbərləri də bu istiqamətdə öz fəaliyyətlərini təkmilləşdirməli və məhsulun təhlükəsiz satışını təmin etməlidirlər.
Qida Təhlükəsizliyi Agentliyinin Sədrinin müavini Rəşad Mafusov sahibkarlara Agentliyin əhalinin sağlam qida ilə təmin edilməsi istiqamətində gördüyü işlər barədə ətraflı məlumat verib. Bildirib ki, bazar tipli ticarət mərkəzlərinin rəhbərləri də bu prosesə qoşulmalıdır. Həmçinin, bu tipli ticarət mərkəzlərində yeni nəzarət sisteminin qurulması təmin edilməlidir.
Sonda bazar tipli ticarət mərkəzləri rəhbərlərinin problemləri dinlənilib və onların həlli istiqamətində fikir mübadiləsi aparılıb.
Xatırladaq ki, Bakının bir çox bazarlarında antisanitariya, natəmizlik hökm sürür. Məsələn, “8-ci km bazarı” və digər bazar tipli ticarət mərkəzlərində ət, balıq və digər məhsullar açıq havada, toz-torpağın içərisində satılır. Ayrı-ayrı vaxtlarda apardığımız reportajlar göstərir ki, nəinki kənd təsərrüfatı məhsulları, həmçinin bəzi qida məhsulları – o cümlədən, yağ, pendir də bu şəraitdə satılır.
pia.az