Ermənistanın yeni hakimiyyəti gəldiyi gündən Robert Köçəryan və Serj Sərkisyanın başını çəkdiyi “Qarabağ klanı”nın və Ermənistan Respublika Partiyasının kadrlarını təmizləməyə başlayıb
Erməni mətbuatının verdiyi xəbərə görə, bütün təmizləmələrə rəğmən bürokratik strukturlarda keçmiş iqtidara yaxınlığı ilə bilinən şəxslər hələ də mühüm vəzifələrdə qalıblar.
Ermənistanın 1-ci informasiya saytının verdiyi məlumata görə, Dövlət vergiləri üzrə komitənin sədri David Ananyan (əsas şəkildə) Serj Sərkisyan devrildikdən sonra belə respublikaçıları vəzifədə saxlamaqla bərabər, onlara yaxın yeni kadrlar işə götürür. Xəbərdə İrəvanın vergi sisteminin bütövlükdə Respublika partiyasının əlində olduğu vurğulanır.
Belə ki, “Sovetski” deyilən vergi bölgələrindən birinə keçmiş iqtisadiyyat naziri Suren Karayanın qaynı Artur Xaçaturyan rəhbərlik edir. Ananyanın müavinlərindən biri respublikaçı deputat Rüstəm Mahmudyanın qardaşı Rəşid Mahmudyan, digəri isə başqa bir deputat Qagik Arutunyanın qohumu Geqam İosipovdur.
İrəvanın Ərəbkir rayonunun vergi idarəsinə Robert Köçəryanın gəlininin xaç atası Tiqran Martirosyan başçılıq edir. Maştots rayonunun vergi idarəsi isə Respublika partiyasının önəmli isimlərindən (parlament fraksiyasının rəhbəri) Vaqram Bağdasaryanın qohumu Karen Sərkisyanın əlindədir. Erebuni rayonunun vergilərinə keçmiş baş nazir, əslən Azərbaycanın Əsgəran rayonundan olan Karen Karapetyanın himayəçiliyi altındakı Hrayr Karapetyan “baxır”.
Məqalədə bütün bu vergi müfəttişliklərinin işinə Tiqran Zakaryanın nəzarət etdiyinə diqqət çəkilir. Tiqran Zəkəryan isə Serj Sərkisyanın köməkçisi Martin Zəkəryanın qardaşıdır.
pia.az