Xaşıqçıoğlunu oğurlayan 15 nəfərin fotoları yayıldı

Türkiyənin hökumətyönlü qəzeti bildirir ki, tanınmış səudiyyəli jurnalistə görə göndərilmiş 15 nəfərlik “sui-qəsd dəstəsi”ni müəyyənləşdirib. Türkiyə rəsmiləri yazar Camal Xaşıqçıoğlunun İstanbuldakı Səudiyyə səfirliyində öldürüldüyünü iddia edirlər.

Strateq.az xəbər verir ki, “Sabah” qəzeti 10 oktyabr buraxılışında 15 səudiyyəlinin adlarını və fotolarını dərc edib. Onların jurnalist yoxa çıxdığı gün Türkiyəyə iki özəl təyyarə ilə getdiyi qeyd olunur. Fotoların aeroportun təhlükəsizlik kameraları ilə çəkildiyi görünür.

Xaşıqçıoğlu oktyabrın 2-də İstanbuldakı Səudiyyə konsulluğuna girəndən sonra yoxa çıxıb. O, türkiyəli nişanlısı ilə evlənməkdən ötrü gərəkən sənədləşmə işini bitirmək istəyirdi.

Türkiyə rəsmiləri onun konsulluq daxilində öldürüldüyünü deyir, Səudiyyə Ərəbistanı bu iddianı rədd edir. Təhlükəsizlik mənbələri qəzetə deyiblər ki, 15 səudiyyəli İstanbula daxil olub, Xaşıqçıoğlu konsulluğa gedən gün onlar da orada olublar və daha sonra ölkəni tərk ediblər.

Türkiyənin Xarici İşlər Nazirliyi oktyabrın 9-da bildirib ki, Səudiyyə rəsmiləri İstanbuldakı konsulluqda araşdırma aparılmasına icazə verib. Prezident Rəcəp Tayyip Ərdogan bu işi həll etməyin onun siyasi və humanitar borcu olduğunu deyib.

Keçmiş qəzet redaktoru olan Kaşıqçıoğlu Səudiyyə Ərəbistanından ötən il çıxıb. O, ölkənin Yəmən müharibəsindəki siyasətini, narazıları susdurmasını tənqid etdiyinə görə ondan qisas alına biləcəyini söyləyib.

pia.az