Etimad İsmayılovu güllələyən Gözəl Dəmirov qətldən üç saat sonra tutulub

Bu zaman Dəmirovun sürücüsü də yanında olub.

Virtualaz.org Türkiyə KİV-lərinə istinadən xəbər verir ki, Dəmirovla İsmayılov sonuncunun ofisində görüşüblər. Onlar çay süfrəsi arxasında hansısa borc məsələsini müzakirə edərkən mübahisə yaranıb və bu zaman keçmiş polis rəisi, istefada olan polkovnik Dəmirov silahını çəkərək İsmayılova 3 dəfə atəş açıb. Daha sonra o ofis işçilərini silahla hədələyərək qaçıb.

Dəmirovun sürücüsü

Yaxalanarkən Dəmirovun qətldə istifadə etdiyi tapança da üzərində olub. O və sürücüsü İstanbul Əmniyyət Müdirliyində dindirilir.

* * *

Etimad İsmayılovun öldürülməsinin səbəbi məlum olub. Türkiyə mediasında yer alan xəbərə görə, Etimad İsmayılov Gözəl Dəmirovla uzun müddətdir ki şərik imiş. Hadisə saat 21:00 radələrində meydana gəlib. İş adamı ofisində güllələnərək qətlə yetirilib.

Məlumatda qeyd edilir ki, Etimad İsmayılov və Gözəl Dəmirov şərikli inşaat və təşkilatçılıq işi ilə məşğul imişlər, aralarında borc məsələsi olub. Hadisədə tərəflər borc məsələsinə görə mübahisə edib. Mübahisə getdikcə böyüyüb və davaya çevrilib. Bu zaman Dəmirov silahını çıxardaraq şərikinə 3 dəfə atəş açıb.

Son məlumata görə, Gözəl Dəmirov gecə saat 01:00 radələrində Beşiktaşda saxlanılıb. Cinayətdə istifadə olunan silah polis tərəfindən götürülüb. Hadisə ilə əlaqədar daha bir nəfər də polis tərəfindən saxlanılıb. Hazırda onlar polis idarəsində dindirilirlər.

Gözəl Dəmirov 90-cı illərin əvvəllərində DİN-də idarə rəisi olub, Bakı Soyuducular Zavodunun direktorunun qardaşıdır, istefada olan polkovnikdir. Dəmirov haqda bunlar məlumdur ki, o, Türkiyədə iri biznesə malikdir, eyni zamanda Azərbaycanda biznes işləri var. Dəmirovun “Fənərbaxça” klubunun keçmiş prezidenti Əziz Yıldırımla biznes əlaqələrinin olduğu da məlumdur.

***

Bir neçə saat öncə İstanbulda keçmiş baş prokuror, keçmiş ədliyyə naziri, keçmiş deputat, məşhur siyasi xadim İlyas İsmayılovun oğlu Etimad güllələnib.

Son illər Etimad İsmayılov İstanbulda bizneslə məşğul olurdu. O, Azərbaycanın və Türkiyənin məşhur jurnalisti Sevil Nuriyevanın əri idi. Sevil Nuriyeva Türkiyə prezidenti R.T.Ərdoğanın fəaliyyətini işıqlandıran jurnalist qrupuna daxildir.

Türkiyə KİV-lərinin məlumatına görə, Etimad İsmayılovu Bakının Suraxanı rayonunun keçmiş polis rəisi Gözəl Dəmirov öldürüb. Türkiyə KİV-lərinin ilkin məlumatına görə, münaqişənin səbəbi biznesdir.

pia.az