Ölkədə ailə həkimi institutunun yaradılması yenidən gündəmə gəlib
Deputat Kamilə Əliyeva "Ailə həkimi haqqında" Qanuna ehtiyac duyulduğunu və bunun, cəmiyyətin sosial sifarişi olduğunu vurğulayıb.
Xatırladaq ki, illər öncə də bu məsələ həm ictimaiyyət, həm də parlamentdə müzakirə mövzusu olub. Əksəriyyət belə bir qanunun qəbul olmasını vacib və əhəmiyyətli hesab edir. Çünki dünyanın əksər aparıcı ölkələrində ailə həkimləri və onların statusunu tənzilmləyəcək qanunvericilik bazası var. Deputatın sözlərinə görə,
Azərbaycanda da ailə həkimləri olarsa, bu, bir çox xəstəliklərin vaxtında müalicəsində, xəstəlik və xəstələrin sayının azalmasında, onların sağlamlıqlarına qovuşmasında böyük rol oynayar.
Maraqlıdır, Milli Məclisin payız sessiyasında sözügedən məsələnin müzakirəsinə yer veriləcəkmi?
Milli Məclisin Səhiyyə Komitəsinin üzvü Məlahət İbrahimqızı Cebhe.info-ya açıqlamasında hazırda parlamentin tətildə olduğunu deyib. O qeyd edib ki, ümumiyyətlə, Milli Məclisin payız sessiyasında gündəliyə qoyulacaq məsələlərdən xəbərsizdir və bu barədə yalnız parlament öz işinə başlayandan sonra danışa bilər.
Onu da bildirək ki, Məlahət İbrahimqızı deputat kimi də məsələyə münasibət bildirmək istəməyib.
pia.az