Müdafiə naziri Davit Tonoyan 102-ci bazanın komandanı ilə görüşəcək
Ermənistanın müdafiə naziri Davit Tonoyan Rusiyanın Gümrüdəki 102-ci hərbi bazasının komandiri ilə görüşə hazırlaşır.
Musavat.com-un erməni mediasına istinadən yaydığı məlumata görə, bu barədə Ermənistanın Müdafiə Nazirliyi xəbər yayıb. Görüşdə məqsəd 17 iyulda Gümrüdəki bazanın 30 hərbçisinin silahlanmış halda Punik kəndinin küçələrinə çıxmasını və ətrafa atəş açaraq, sakinlərə vahimə yaşatmasını müzakirə etməkdir. Nazirlik sözçüsü Artsrun Ovannisyan deyib ki, ola bilsin, görüşdə Rusiyanın Ermənistandakı səfiri Sergey Kopırkin də iştirak etsin.
Xatırladaq ki, dünən Panik kəndinin sakinləri atəş və partlayış səslərindən vahiməyə düşüblər. Onlar əvvəlcə nə baş verdiyini anlamasalar da sonradan atəş açan hərbçilərin ruslar olduğunu öyrəniblər. Bazanın əsgərləri heç bir sənədləri və icazə kağızları olmadığı halda, kəndə daxil olublar və “hərbi təlim” keçiblər ki, bu da Ermənistanda sərt etirazlar doğurub.
pia.az