“İlkinin sağlıq durumu normaldır. Təcridxana rəhbərliyi ilə münasibətləri bir balaca pozulub. İlkində də günah var, o biri tərəfdə də”
Bu sözləri həbsdə olan NİDA üzvlərindən İlkin Rüstəmzadənin atası Bakir Rüstəmov “Yeni Müsavat”a bildirib.
Onun sözlərinə görə, bu gün İlkinlə görüşə bilməsə də, həbsxana rəisi ilə görüşüb: “Deyirlər, İlkinin saçını zorla qırxmayıblar. Su probleminə gəlincə, həbsxanada su problemi olmayıb. Üç rəislə görüşdüm. Mənə dedilər, “sənin evində də, mənim evimdə də, Bakıda da işıq sönüb, amma burada generator olub, işıq yanıb. İşıq və su problemimiz olmayıb. Məlumat nəyin əsasında yayıblar, o maraqlıdır?!”. İlkinin özü ilə görüşə bilmədim, amma rəis deyir, yaxşıdır”.
REAL sədri İlqar Məmmədovun həyat yoldaşı Vəfa Məmmədova isə bildirib ki, Məmmədovun işi Şəki Apelyasiya Məhkəməsinə qaytarılıb:
“Sağlığı ilə bağlı hələ ki, şikayəti yoxdur. Hər şey normal qaydasında gedir. Sağlıq durumu yaxşıdır, özünü yaxşı hiss edir. Tək problem var, o da işin təkrar Şəki Apelyasiya Məhkəməsinə qaytarılmasıdır. Yəqin bu yaxınlarda İlqar təkrarən Şəkiyə köçürüləcək. Artıq üçüncü dəfədir. Uzaq yoldur. Aparılıb gətirilmək narahatlıq verir. Həm iş uzanır, həm özü üçün yol gedib qayıtmaq narahatlıqdır. Yerini dəyişir. Burada özünə yer tutub, dırnaqarası rahatlığını tapıb. Hər dəfə Şəkiyə gedib-gəlmək ailə üçün də böyük narahatlıqdır”.
Hazırda cəzasını Penitensiar Xidmətin 17 saylı cəzaçəkmə müəssisində çəkən AXCP Rəyasət Heyətinin üzvü Seymur Həzi atası Məşğul Həziyev oğlunun vəziyyətindən razılıq edir: “Seymurun vəziyyəti normaldır, yaxşıdır”.
pia.az