Məşhur bir söz var: “Mənə vicdasınz bir mətbuat verin, cəmiyyəti məhv edim”
Bu sözləri tamamilə Azərbaycan səhiyyəsinə transfer etmək olar.
Bizə bir vicdansız səhiyyə məmurları nəsib olub və onlar cəmiyyətin məhvi üçün nə lazımdırsa əllərindən gələni əsirgəmirlər.
Bu gün xəstəxana, həkim adları gələndə hər kəsin dalağı sancır, insanlar mümkün qədər gec həkimə gedirlər, türkəçarə, xalq təbabəti üsulları ilə sağalmağa çalışırlar.
Çünki onları xəstəxanaları qəssabxanalara çevirmiş çoxlu rüşvətxor və savadsız, səhlənkar, xəstəsinə müştəri kimi baxan, onu soğan qabığı kimi soymağa hazır həkimlər gözləyir.
İşin bir tərəfi pul qoparılması olsa, dərd yarı, hətta xəstəxanaya sağ girib ölü çıxanların hər ay qeydə alınması normaya çevrilməkdədir.
Məsələn, Qaxda bir ay əvvəl qeysəriyyə əməliyyatı ilə dünyaya uşaq gətirən qadın xəstəxanada ölüb.
Rayonun Zəyəm kənd sakini, 1993-cü il təvəllüdlü Fildurə Vahid qızı Novruzlu iyulun 6-sı səhər saat 10 radələrində ağır vəziyyətdə Qax Mərkəzi Rayon Xəstəxanasının (MRX) reanimasiya şöbəsinə daxil olub. 25 yaşlı Fildurə Novruzlu axşam saat 17 radələrində reanimasiya şöbəsində dünyasını dəyişib.
Qazaxın Müalicə Diaqnostika Mərkəzində xəstə cərrahiyə əməliyyatından sonra dünyasını dəyişib. R.Mustafayev iyunun 30-da Ağstafa özünə məxsus avtomobildən düşən zaman “VAZ” markalı avtomobil onu vuraraq sağ ayağını sındırıb, ayağından əməliyyat olunubmuş.
Yəni, elə də böyük əməliyyat deyil. Sadəcə xəstə narkozdan ayılmayıb, ya doza çox olub, ya da ümumiyyətlə narkoz vermək olmazmış. İyunun 29-da M.Mustafayevin qohumu, Ağstafanın Poylu kənd sakini, 1954-cü il təvəllüdlü Dəmirova Natalya da Qazax Müalicə Diaqnostika Mərkəzində qarın yırtığından əməliyyat zamanı dünyasını dəyişib.
Anaxeber.Az-ın məlumatına görə, səhiyyə naziri Oqtay Şirəliyevin idarəçliyi altında bu iki ölüm faktı təkcə son 1 həftə ərzində baş verib.
İlin statistikasını hazırlasaq, yol qəzalarındakı ölümlərdən sonra ikinci yeri xəstəxanalarda, klinikalarda həkim səhlənkarlığından tələf olan insanların siyahısı tutar.
Hər ay ana və uşaq ölümləri, əməliyyat masasında həkim səhlənkarlığından dünyasını dəyişənlərin xəbərləri gəlməkdədir.
Onlar fərq etmir ki, hansı rayon xəstəxanasında can verirlər, dəhşət doğuran reallıq O.Şirəliyevin qurduğu səhiyyə sisteminin insan qəssabı, insan qatili olmasıdır.
Həkimlər insana tibbi xidməti biznesə çeviriblər. Bu da faciələrə yol açmaqdadır. Bütün sahələrdə səhlənkarlığa, rüşvətə göz yumulması başadüşüləndir, amma insan sağlamlığına birbaşa cavabdeh olan səhiyyənin rüşvət bataqlığında boğulması xalqa və onun genofonduna xəyanətdir, cinayətdir, gələcək nəsillərə pislikdir.
Əslində, səhiyyədəki problemlərin hansı yerindən başlasan, qandonduran faktlar meydana çıxır: prokurorluğun ifşa etdiyi saxta dərman satan həkimlər, dövlətin xəstəxanalara ayırdığı tibbi ləvazimatların, pereparatların apteklərdə satılması, yaşlı qadının sağlam ayağının səhvən kəsilməsi, baş həkimlərin rayon mərkəzi xəstəxanalarını, doğum şöbələrini rüşvət yuvalarına çevirməsi, ən nəhayət iki gün ölkədə yaşanmış enerji fəlakəti zamanı xəstəxanalarda generatorların olmamasının üzə çıxması O.Şirəliyevin bir nazir kimi Azərbaycan səhiyyəsini qətlə yetirdiyini, rüşvət xərçənginə yoluxdurduğunu, artıq metastaz verməkdə, qan qusmaqda olduğunu bir daha sübut etdi.
Üstəlik, xəstəxanalarda generatorların olmamasını mətbuat və yaxud adi vətəndaşlar iddia etmədi, şəxsən prezident İlham Əliyev keçirdiyi müşavirədə nazirin üzünə dedi, onun yalan danışdığını ortalığa qoydu.
Hələ bu azmış kimi, nazir hamının gülüş obyektinə çevrilən açıqlama verərək yayın istisində bütün cəmiyyəti qəhqəhəyə boğdu. Şirəliyev elan etdi ki, icbari tibbi sığorta sahəsində başqa ölkələr Azərbaycandan nümunə götürürlər.
Həmin ölkələrin Mozambik yoxsa Somali olduğunu müəyyən edə bilməsək də, Azərbaycanda icbari tibbi sığortanın olmadığı yeni doğulmuş körpələrə də agahdır.
Nazirin bu açıqlamanı verərkən hansı ovqatda olduğunu demək çətindir, amma görünür ki, prezidentin müşavirədə onun yalanının ifşa etməsinə baxmayaraq, əhval-ruhiyyəsi yüksək olub.
Anaxeber.Az-ın məlumatına görə, bu ilin ilk 3 ayı ərzində 7 ana ölümü qeydə alınıb. Bu, nazirliyin rəsmi məlumatıdır. Ötən il isə 20 ana dünyasını dəyişib.
Səhiyyə Nazirliyinin baş mama-ginekoloqu Sevinc Məmmədovanın bu məlumatı sanki heç nə olmamış bir adi statistikadır. Faktiki olaraq, hər bir ölümdə həkim səhlənkarlığı var.
Bundan əlavə, özəl klinikalardakı ölümlər, vətəndaşlara qoyulan səhv diaqnozlar, qiymətlərin dəhşətli dərəcədə baha olması və nazirliyin bu soyğunçuluğa müşahidəçi qalması, dövlət tibb müəssisələrində ələbaxımlılıq, dilənçilik açıq şəkildə gedir.
Bunu deputat Elmira Axundova da demişdi. İnsanların Şirəliyevin səhiyyəsinə zərrə qədər etibarı qalmayıb. Ona görə İran, Türkiyə, Gürcüstana üz tuturlar.
Elə məmurlar, nazirlər də Azərbaycan səhiyyəsinə güvənmirlər. Hətta xatırlayırsınızsa, ABŞ öz vətəndaşlarını Bakıdakı apteklərdən dərman almamağa çağırmışdı.
Sonda məlum oldu ki, dərman mafiyasında həkimlərlə gömrük generalları əlbir imiş. Belə səhiyyəyə isə nə əcnəbilər, nə öz vətəndaşlarımız bel bağlaya bilər.
Şirəliyevin korrupsiyaya bulaşmış idarəçiliyinin nəticəsidir ki, vərəm dispanseri külə dönərək 30 nəfərin diri-diri yanmasına səbəb oldu.
Bəs iyunun 7-də baş vermiş ölüm faktına nazir nə deyə bilər? Füzuli rayon Horadiz qəsəbə sakini, 1989-cu il təvəllüdlü Gülnarə Əhmədova Respublika Perinatal Mərkəzinə yerləşdirilib. İyunun 9-da o, 1 kiloqram 900 qram çəkili oğlan uşağı dünyaya gətirib.
G.Əhmədovanın bətnindəki 35 həftəlik uşaq qeysəriyyə yolu ilə götürülüb. Lakin iyunun 11-nə keçən gecə yeni doğulmuş oğlan uşağı naməlum səbəbdən vəfat edib.
Cinayət işi başlansa da, digər ölüm faktları kimi bu olay da bağlanır, kimsə cəzalandırılmır.
Ümumiyyətlə, Şirəliyev əli qana batmış həkimlərinin arxasında dayanır, cəzalandırılmasına imkan vermir, vətəndaşların şikayətlərinə baxılmır
Bu özbaşınalıq, xəstəxanalardakı rüşvət, səhlənkarlıq günün birində partlayışa səbəb ola bilər. Bir gün nazirliyin qabağında kimsə özünü yandırsa, təəccüblənmərik.
Azərbaycan səhiyyəsində rüşvət olmadığını deyən nazirə onlarla video faktlar, şikayətlər göstərmək olar. Son olaraq ATU tələbələrinin rezidentura ilə bağlı keçirdiyi aksiya da nazirliyin mürtəc qərarına etiraz idi.
Klinikalarda pasientlərin başınaq oyun açılması, onkoloji xəstələrin yaxınlarının soğan qabığı kimi soyulması, əməliyyat masasında ani səhvdən insan ölümü, doğum şöbələrində açıq bazarlıq, regionlardakı xəstəxanalarda rəzalət və s. hallar əhalini partlayış nöqtəsinə gətirib çıxarıb.
Elə Azərbaycan hakimiyyətində təmsil olunanlar da, Oqtay Şirəliyev də, müavini Elsevər Ağayev də, başqaları da ölkə səhiyyəsinə güvənmirlər.
Nə tibbi sığorta var, nə can təminatı, nə qiymətlərə nəzarət, nə dövlət xəstəxanalarında pulsuz xidmət, nə özəl klinikalarda tariflərin tənzimlənməsi...
Şəkərli diabetlər, onkoloji xəstələr, vərəmli, cüzamlı insanlar, minlərlə vətəndaşın büdcədən ayrılan pulları, dərmanları mənimsənilir, satılır, biznesə çevrilir.
Bütövlükdə isə səhiyyədəki vəziyyətlə bağlı damğanı prezident müşavirədə vurdu və nazir yalanyalançı çıxdı.
pia.az
Digərxəbərlər
Populyar xəbərlər
