Müharibə fonunda koronavirus təhlükəsi arxa plana keçib?

“Müharibə ilə bağlı Müdafiə Nazirliyi və müvafiq qurumlar məşğuldur. Koronavirusala bağlı mübarizədə isə ayrıca olaraq Operativ Qərargah yaradılıb. Düşünürəm ki, hər bir qurum öz işi ilə məşğul olmalıdır”.

Bu sözləri tibb elmləri doktoru Adil Qeybulla son günlərdə ölkəmizdə koronavirusa yoluxma sayının artmasının səbəblərini PİA.az-a şərh edərkən qeyd edib.

Son günlər Azərbaycanda koronavirusa yoluxma sayı artır. Hətta yoluxma sayı dünən 300-ə yaxınlaşdı.

Bunu karantin tədbirlərinin yumşaldılması, insanların sosial məsafə, tibbi qoruyuculardan istifadəyə maraq göstərməməsi ilə əlaqələndirənlər var.

Həmçinin də koronavirusa infeksiyasınən artmasına səbəb kimi Qarabağ müharibəsinin başlanması da göstırilir. Belə ki, Qarabağdan gələn xəbərlərə görə Bakıda və rayonlarda insanlar virusu unutduqları və riayət etmədikləri bildirilir.

Bəs həqiqətənmi müharibə fonunda koronavirus təhlükəsi arxa plana keçib və mübarizə səngiyib?

Mövzu ilə bağlı PİA.az-ın əməkdaşı tibb elmləri doktoru, professor Adil Qeybullaya müraciət edib.

Adil Qeybulla: “Koronavirusun çoxalmasında müharibə faktından çox vətəndaş məsuliyyətsizliyi var”.

Televiziya ekranlarında da koronavirusla bağlı təbliğatın xeyli zəiflədiyini nəzərə çatdıran professor PİA.az-a açıqlamasında bildirib ki, müəyyən mənada koronavirusla mübarizə müharibə fonunda arxa plana keçib, kakin koronavirus pandemiyasını unutmaq olmaz:

“Müharibə fonunda koronavirus təhlükəsinin arxa plana keçməsi və mübarizənin səngiyiməsi faktı var. Qarabağ müharibəsinə görə diqqətlər ancaq cəbhəyə yönəlib. Amma koronavirusun çoxalmasında müharibə faktından çox vətəndaş məsuliyyətsizliyi var. Vətəndaş məsuliyyətsizliyini biz avtobuslara baxanda görə bilərik.

Həmçinin də müəllimlər sinif otaqlarında maskasız otururlar və söhbət edirlər. İndi də karantin qaydaları insanların beyninə aşılanmalıdır. Televiziya ekranlarında da koronavirusla bağlı təbliğat xeyli zəifləyib. Amma hesab edirəm ki, koronavirus infeksiyasını unutmaq olmaz.

Onu da qeyd edim ki, ordu ilə bağlı Müdafiə Nazirliyi və müvafiq qurumlar məşğuldur. Koronavirusala bağlı mübarizədə isə ayrıca olaraq Operativ Qərargah yaradılıb. Düşünürəm ki, hər bir qurum öz işi ilə məşğul olmalıdır”.

Nərminə UMUDLU
pia.az