Cümə axşamı, 28 Mart 2024
USD : 1.7
EUR : 1.8724
Hava
+25 ° Baku
+18 ° Quba
+17 ° Qusar
+22 ° Gəncə
+27 ° Lənkəran
+32 ° Naxçıvan
+30 ° Salyan
+19 ° Şəki

Karantində qalan Azər Zadə: “14 gündə hər kəsdən 2, məndən 3 analiz götürdülər”

Dünyanı cənginə alan koronavirus pandemiyasına qarşı mübarizə tədbirləri davam etməkdədir...

Çindən başlayaraq, bir çox ölkələrə, eləcə də Azərbaycana yayılmış koronavirusa qarşı mübarizə aparmaq üçün çox ciddi tədbirlər görülür. Xaricdə olan həmvətənlərimiz mövcud vəziyyətlə əlaqədar, bir sıra ölkələrlə müqayisədə daha təhlükəsiz olan Azərbaycana üz tuturlar.

Onlardan biri İtaliyada yaşayan Azər Zadədir (Rzazadə).

Oxu.Az Milanın “La Skala” Akademiyasında təhsil alan ilk azərbaycanlı opera ifaçısı, Ozimo Opera Sənəti Akademiyasının məzunu, bir çox beynəlxalq müsabiqələrin qalibi, Xalq artisti Zaur Rzayevin oğlu Azər Rzazadə ilə müsahibəni təqdim edir.

- “La Skala”da təhsil alan ilk azərbaycanlısınız və məzun olduqdan sonra İtaliyada yaşamaq qərarına gəlmisiniz. Özünüz haqqında danışardınız.

- 1990-cı ildə Bakıda ziyalı, musiqiçi ailəsində doğulmuşam. Musiqiyə sevgim də atam Zaur Rzayev sayəsində yaranıb. Hər zaman təhsilimə üstünlük vermişəm. Səsimi ilk dəfə uşaqlıq illərimdə kəşf etdilər. Atam bunu biləndə mənə dəstək oldu. Opera sahəsini seçdim və özümü daha da inkişaf etdirmək üçün bu musiqi janrının vətəninə - İtaliyaya getməyi qərara aldım. Bakıda Milli Konservatoriyada professor Hüseyn Əliyevin sinfində təhsil almışam. Daha sonra Milanda “La Skala” Akademiyasını bitirmişəm.

Yaradıcılığıma İtaliyada davam etdim. Bu günə qədər bir çox müsabiqələrdə iştirak etmişəm, qalib olmuşam. İtaliyanın opera səhnələrində “Traviata”, “Maqbet”, “Bohema” və digər əsərlərdə aparıcı partiyaların ifaçısı olmuşam. Mövcud vəziyyətə qədər Avstriya, Fransa, Yunanıstan və digər ölkələrdə qastrol səfərlərində olmuşam.

- Əvvəllər Azərbaycana tez-tez gəlirdiniz?

- Əlbəttə. Valideynlərim burada yaşayır. İtaliya gözəldir, amma insan öz vətənində olduğu qədər heç yerdə rahatlıq tapa bilmir. Azərbaycana tez-tez gəlirdim.

- Mövcud vəziyyət dediniz. Söhbət koronavirus pandemiyasından gedir?

- Təəssüf ki, bəli. Bilirsiniz, Çindən sonra ən çox yoluxma halı qeydə alınan ölkələrdən biri də İtaliyadır.

- Bir qədər bu barədə danışmağınızı istərdik. İlk olaraq nə zaman eşitdiniz ki, İtaliyada koronavirus yayılıb?

- Bu söhbətlər yayılanda mən Moskvada Böyük Teatrda idim. Sonra Bakıya döndüm və 4 gün sonra Milana uçmalı oldum. Çünki Venesiyada tamaşamız vardı. Mən Milana çatanda bu barədə öyrəndim və təəssüf ki, virusun, demək olar ki, episentrinə düşdüm. Bir qədər sonra ölkədəki vəziyyət insanları narahat etməyə başladı.

Bütün tamaşalar, konsert proqramları ləğv olundu. Mənim bir neçə şirkətlə imzaladığım müqavilələr təxirə salındı. Azərbaycana qayıtmalı oldum.

- Azərbaycana qayıtdığınız zaman karantinə alındınız. Karantində vəziyyət necə idi?

- Əvvəlcə onu deyim ki, mən Azərbaycana Milan - Moskva - Bakı marşrutu ilə gəldim. Təbii ki, hava limanında özüm yaxınlaşdım və bildirdim ki, İtaliyadan gəlmişəm. Əvvəlcədən valideynlərimlə danışmışdım və demişdim ki, evə gəlməyəcəyəm. Çünki bu ciddi prosesdir. Yoxlanılmadan virus daşıyıcısı olub-olmadığımızı öyrənə bilmərik.

Aidiyyəti üzrə məni və digər bir neçə nəfəri Cəlilabad Mərkəzi Rayon Xəstəxanasına apardılar. Mərkəzin ikinci və üçüncü mərtəbəsində xüsusi palatalar ayrılmışdı. İnsanlar iki-iki qalırdılar. Bunu deməyim yanlış anlaşılmasın, heç bir ayrıseçkilik yox idi. Sadəcə, belə alındı ki, mən tək otaqda qalırdım. Otaqlarda şərait çox yaxşı idi. Səliqəli idi. Otaqları gün ərzində 4 dəfə təmizləyirdilər. Natəmizlik müşahidə etmədim.

Sadəcə, bir gün su problemimiz oldu. Onu da bildirdik və qısa zamanda həll olundu. Bəzən bu kimi hallarda insanlar çox aqressiv yanaşırlar. Amma belə çətin vəziyyətdə bir-birimizə dəstək olmalıyıq. 10 pozitiv məqamdan bir neqativi görmək, onu qabartmaq düzgün deyil.

- Karantində gündəlik nələr edirdiniz?

- Mən Milanda olanda da evdə darıxırdım. Bakı, mətbəximiz üçün. Amma karantində sıxılmadım. Bizə çox ciddi nəzarət edirdilər. Həkimlər hər şeyə çox ciddi yanaşırdılar. Biz də onlara kömək etmək üçün təlimatlara əməl etməyə çalışırdıq. 14 gün ərzində məndən üç dəfə analiz götürüldü. Bildirdilər ki, bunu ehtiyat məqsədilə edirlər. Əslində, hər kəsdən iki dəfə analiz götürülmüşdü.

İkinci mərtəbədə təxminən 9-10 nəfər qalırdıq. Hər saatın tamamında hərarətimiz ölçülürdü. 14 gün ərzində hərarətim 36,2 – 36,6 aralığında dəyişib. Bir gün belə öskürək və ya hərarətimin yüksəlməsi müşahidə edilməyib.

- Karantində hansı yaş qrupundan olan insanlar çox idi?

- Qadın, kişi, gənc, qoca - fərqi yox idi. Hər yaş qrupundan olan insanlar var idi. Üçüncü mərtəbədə tələbələr qalırdı. Hər kəs eyni qaydada 14 gün boyunca həkimlərin göstərişlərinə riayət etdi. Müddət bitdikdən sonra isə evə buraxıldıq.

- Karantində qalan şəxslərin analiz nəticələrində müsbət nəticə olan oldumu?

- Xeyr. Bizimlə bərabər qalan şəxslərin, demək olar ki, hamısı xaricdən gəlmişdi. Onların heç birində koronavirus diaqnozu təsdiqlənmədi. Bütün nəticələr mənfi oldu. Bizi, sadəcə, ehtiyat məqsədilə saxlamışdılar.

- Bir müddət əvvəl atanızın koronavirus şübhəsi ilə karantinə alındığına dair məlumatlar yayılmışdı. İstərdim, bu məlumata da aydınlıq gətirəsiniz.

- Bəli, təəssüf ki, bu günlərdə mediada Zaur Rzayevin karantinə alınması ilə bağlı qeyri-dəqiq məlumat yayılmışdı. Bu, həqiqəti əks etdirmir. Xahiş edirəm, belə məlumatları yayıb insanları təlaşa salmayaq. Mənim atam evdədir, səhhətində heç bir problem yoxdur.

- Bəzi insanlar karantindən qorxur. Onlara nə demək istərdiniz?

- Bu çox səhv yanaşmadır. Karantindən qətiyyən qorxmaq lazım deyil. Bu bizim, yaxınlarımızın təhlükəsizliyi üçün önəmlidir. Sadəcə, əgər bu məsələdə narahatlıq keçirən insanlar varsa, onlara qarşı bir qədər daha həssas yanaşılmalıdır. 

- Proseslərin nə qədər davam edəcəyi bilinmir. Qarşıda sənətlə bağlı hansı planlarınız var?

-  Mənim vəzifəm Azərbaycanı başqa ölkədə layiqincə təmsil etmək idi. Düşünürəm ki, indiyə kimi bunun öhdəsindən layiqincə gəlmişəm. Düşünmürəm ki, bu dəqiqə hər şey bitsə, mən yenidən İtaliyaya qayıdacağam. Ümumiyyətlə, bu barədə hələ düşünmürəm. Çünki əvvəlcə canımız sağlam olmalıdır. Daha sonra isə bizi nələrin gözlədiyini görəcəyik.

pia.az


Etiket: Azər Zadə

Şərh yazın.


Digərxəbərlər

General Mövlam Şıxəliyevin 2 milyondan çox əmlakı özünə qaytarıldı - Siyahı

Putinin ilhaq və səfərbərlik qərarı - Bundan sonra müharibənin taleyində hansı faktorlar əsas rol oynayacaq?

Populyar xəbərlər

Aprel ayında bu bürcü fantastik pul və yeni vəzifə gözləyir

Sabiq milli təhlükəsizlik naziri Namiq Abbasov vəfat edib

Azərbaycan XİN Namiq Abbasovun vəfatı ilə bağlı paylaşım edib

Hikmət Hacıyev NATO-nun eks-baş katibi ilə bağlı paylaşım edib: Hesabatına ödənişi əlavə etməyi unudub

“Crocus”da insanları xilas edən Emil Hüseynov və anası baş verənlərdən danışdılar - Video

"Belə iddia səsləndirəndə mətndə rəqəm, hesabat olur, daha səbət və gilas yox" - AYNA sərt tənqid edildi

Bakıda və üç rayonda qazın verilişində məhdudiyyət olacaq

Binə qəbiristanlığında çayxana tikilir? - Video

Bakıda 13 yaşlı oğlan internat məktəbindən qaçaraq atasını axtarır

Ən çox oxunanalar