İçərişəhərdə baş verən partlayışda xəsarət alanların adları məlum olub - Yenilənib, Foto

"Report" xəbər verir ki, bunlar 78 yaşlı Vaqif İsmayılov, oğlu Ceyhun İsmayılov, Ceyhunun həyat yoldaşı Səidə İsmayılova, həmçinin V.İsmayılovun nəvələri - 14 yaşlı Rəvan və 18 yaşlı Fəriddir. 

Yaralılardan yalnız biri xəstəxanaya getməyib.

***

Bakı şəhəri, Səbail rayonu ərazisində, İçərişəhərdə baş verən partlayışda xəsarət alanlardan 2 nəfərinin vəziyyəti yüngül olduğundan onlar ilkin yardım göstərildikdən sonra evə buraxılıblar.

"Report"un xəbərinə görə, hazırda Azərbaycan Dövlət Həkimləri Təkmilləşdirmə İnstitutunun (ADHTİ) Plastik və Rekonstruktiv Cərrahiyyə Klinikasının nəzdində fəaliyyət göstərən Yanıq şöbəsində 3 nəfərin müalicəsi davam etdirilir.

Qeyd edək ki, hadisə ikimərtəbəli binada baş verib.

***

Yanıq xəsarətləri alanlardan ikisi yeniyetmə, biri isə yaşlı kişidir.

Xəstəxanadan Oxu.Az-a verilən məlumata görə, xəstələrin vəziyyəti orta-ağırdır.

Həmçinin, qeyd edilib ki, bir nəfərə hadisə yerində yardım edilib.

İçərişəhər Qoruğundan saytımıza verilən məlumatda bildirilib ki, hadisə yerinə Fövqəladə Hallar Nazirliyin əməkdaşları cəlb edilib. Partlayışın səbəbi bilinmir.

***

Bakıda qaz sızmasından partlayış baş verib.

Qafqazinfo-nun verdiyi xəbərə görə, hadisə bir neçə dəqiqə öncə İçərişəhərdə baş verib.

İlyas Əfəndiyev 10 ünvanında yerləşən yaşayış binasında baş verən qaz sızması nəticəsində yaranan partlayışda beş nəfər xəsarət alıb.

Hazırda yanğınsöndürənlər əraziyə cəlb olunub.

***

İçərişəhərdə yaşayış binasında partlayış olub.

APA-nın məlumatına görə, hadisə nəticəsində xəsarət alanların olduğu bildirilir.

Tibbi Ərazi Bölmələrini İdarəetmə Birliyindən (TƏBİB) APA-ya verilən məlumata görə, partlayışda 3 nəfər yanıq xəsarəti ilə təcili yardımla 5 saylı şəhər Xəstəxanasına aparılıb.

pia.az