Gömrükdə daha bir qalmaqal – Vətəndaşın malını əlindən aldılar

Bunu vətəndaş Samir Mobil oğlu Əhmədov deyir. O, “Sınıq Körpü” Gömrük Sərhəd Buraxılış Məntəqəsinin rəisi Vüsal Nuriyevin ona qarşı qanunazidd hərəkətlərindən və və qeyri-etik davranışından şikayətçidir.

Yenicag.az-a müraciət edən Samir Əhmədovun sözlərinə görə, Nazirlər Kabinetinin 305 saylı Qərarına əsaslanaraq, iyunun 28-də şəxsi istifadə məqsədilə Gürcüstanda aldığı “BEKO” markalı kondisioneri Azərbaycan ərazisinə keçirmək istəyib.

Lakin adıçəkilən gömrük məntəqəsinin rəisi Vüsal Nuriyev Əhmədova məxsus kondisionerin müsadirə olunaraq, anbara yerləşdirilməsini əmr edib: “Həmin gömrük məntəqəsinin vəzifəli şəxsi Ülfət Əkbər oğlu Rzayev mənə 119061100501155 saylı akt verdi və kondisioneri əlimdən zorla aldılar.

Ancaq mənə verilən akta möhür vurulmadı. Mən göstərdiyim tarixə – 2019-cu il iyunun 28-nə kimi Gürcüstan Respublikasında olmamışam, sərhədi keçməmişəm və təbii ki, oradan heç bir mal-məhsul gətirməmişəm. Bu barədə ümumvətəndaş pasportumdan çıxarışı da sizə təqdim edirəm.

İyulun 5-də Vüsal Nuriyevə müraciət edib, həmin kondisioneri şəxsi istehlak məqsədilə ölkə ərazisinə keçirməyə hüququm olduğunu bildirdim və kondisionerin mənə qaytarılmasına kömək göstərməyini xahiş etdim.

Ancaq Vüsal Nuriyev özünü dövlət məmuru kimi aparmadı. O, nə qanun sayır, nə fərman. Nə baş naziri tanıyır, nə də heç kimi… Saysa idi bu hərəkətə yol verməzdi və özünün vəzifə səlahiyyətlərindən sui-istifadə edərək, qanunla mənim gömrükdən maneəsiz keçirməli olduğum kondisioneri zorla əlimdən almaz, özümə təhqiramiz sözlər deməzdi. İyulun 10-da Tovuz rayonunda yerləşən Gömrük İdarəsinə də getdim. Qurumun əməkdaşları bu məsələyə qarışmağa səlahiyyətlərinin olmadığını deyərək, Vüsal Nuriyevin açıq-aşkar qanunu pozduğunu bildirdilər”.

Hüquqlarının pozulduğunu bildirən vətəndaş Samir Mobil oğlu Əhmədov üzləşdiyi problemin həlli üçün ölkə rəhbərliyinə və Dövlət Gömrük Komitəsinin sədrinə mürtaciət edib. Əhmədov ona məxsus olan 1 ədəd “BEKO” markalı kondisionerin geri qaytarılmasını və ölkə qanunlarına məhəl qoymayan Vüsal Nuriyevin sərt şəkildə cəzalandırılmasını xahiş edib.

pia.az

pia.az