Əli Kərimli sərbəst buraxıldı: 2500 manat cərimələndi

Məhkəmənin qərarı ilə Ə.Kərimli 2500 manat cərimə olunub və sərbəst buraxılıb.

Digər saxlanılanlar isə 400 və 500 manat məbləğində cərimələniblər.

Məhkəmə binası qarşısında Əli Kərimlini onlarla tərəfdarı qarşılayıb.

AXCP sədri tərəfdarları önündə çıxış edərək saxlanılmasını qanunsuz adlandırıb.

Ə.Kərimli bəyan edib ki, tezliklə KİV üçün daha ətraflı məlumat yayılacaq.

 

* * *

AXCP sədri Əli Kərimli Səbail Rayon Məhkəməsinə gətirilib.

Bu barədə sosial şəbəkələrdə AXCP fəalları məlumat paylaşıblar.

Xatırladaq ki, noyabrın 17-i saat 15 radələrində AXCP rəhbərliyi və bir qrup partiya fəalı, eləcə də digər siyasi qurumların nümayəndələri Dirçəliş günü ilə bağlı Şəhidlər Xiyabanına icazəsiz yürüşə cəhd ediblər. Nəticədə 52 nəfər saxlanılaraq Səbail Rayon Polis İdarəsinə aparılıb.

Orada izahatı alındıqdan sonra 41 nəfər, o cümlədən Cəmil Həsənli sərbəst buraxılıb.

Ə.Kərimli İnzibati Xətalar Məcəlləsinin 513.1-ci ( Yığıncaqların, mitinqlərin, nümayişlərin, küçə yürüşlərinin və piketlərin təşkilinin və keçirilməsinin “Sərbəst toplaşmaq azadlığı haqqında” Azərbaycan Respublikasının Qanunu ilə müəyyən edilmiş qaydasının toplantının təşkilatçısı tərəfindən pozulmasına görə) və 513.2-ci (“Sərbəst toplaşmaq azadlığı haqqında” Azərbaycan Respublikasının Qanunu ilə müəyyən edilmiş qaydada təşkil edilməyən yığıncaq, mitinq, nümayiş, küçə yürüşü və ya piketdə iştirak etməyə görə) maddələri ilə ittiham edilir.

Digər şəxslər isə təkcə 513.2-ci maddə ilə təqsirli bilinirlər.(virtualaz.org)

pia.az