Bir sıra məşhurun “Twitter” hesabı hakerlər tərəfindən oğurlanıb - Foto

Musavat.com-un “Reuters”ə istinadən verdiyi xəbərə görə, hesabı oğurlananlar arasına hazırkı ABŞ prezidenti Donald Trampın prezident seçkilərindəki ən güclü rəqibi Co Baydenin, "Amazon" şirkətinin rəhbəri Cef Bezosun, "Tesla" şirkətinin rəhbəri Elon Maskın, sabiq ABŞ prezidenti Barak Obamanın, "Maykrosoft"un qurucusu Bill Geytsin, reper Kanye Vestin, o cümlədən "Uber" və "Apple" şirkətlərinin rəsmi hesabları daxildir.

Hesabları ələ keçirən hakerlər yuxarıda adı çəkilən məşhurların izləyicilərindən bitkoin kriptokurrensiyası tələb ediblər.

Onlar, qeyd etdikləri ünvana növbəti 30 dəqiqə ərzində 1000 dollar məbləğində bitkoin göndərəcək şəxlərə 2000 dollar dəyərində bitkoin göndərəcəklərini bildirən paylaşımlar ediblər.

Qeyd edək ki, "Twitter" rəsmi olaraq bu paylaşımların silindiyini və problemin həlli yolunda çalışdıqlarını bildirib. Bu hadisədən sonra “Twitter” səhmlərinin 4 faiz aşağı düşdüyü deyilir.

Hazırkı hesablamalar onu göstərir ki, internet fırıldaqçıları yarım saat ərzində dəyəri 100000 dollardan çox olan kriptokurrensiya əldə ediblər.

pia.az