Belarusda müxalifətin Koordinasiya Şurasının yaradılması ilə əlaqədar cinayət işi açılıb.
APA-nın RİA Novosti-yə istinadən verdiyi xəbərə görə, bu barədə ölkənin baş prokuroru Aleksandr Konyuk bildirib.
"Koordinasiya Şurasının yaradılması və fəaliyyəti dövlət hakimiyyətini ələ keçirmək, eyni zamanda Belarus Respublikasının milli təhlükəsizliyinə xələl gətirmək məqsədi daşıyır. Bu faktla bağlı Cinayət Məcəlləsinin 361-ci maddəsi ilə cinayət işi açılıb", - deyə baş prokuror vurğulayıb.
Qeyd edək ki, "Milli təhlükəsizliyə zərər vurmağa yönəlmiş fəaliyyətə çağırışlar" maddəsi ilə ittiham olunanlara 5 ilə qədər həbs cəzası verilə bilər.
Xatırladaq ki, Belarusda müxalifətin Koordinasiya Şurasının İdarə Heyətinin üzvləri seçilib.
Yazıçı, Ədəbiyyat üzrə Nobel mükafatı laureatı Svetlana Aleksiyeviç, hüquqşünaslar Liliya Vlasova və Maksim Znak, Minsk Traktor Zavodunun tətil komitəsinin nümayəndəsi Sergey Dilevskiy, Svetlana Tixanovskayanın köməkçisi Olqa Kovalkova, S. Tixanovskayanın müttəfiqi Mariya Kolesnikova və Yanka Kupala teatrının keçmiş baş direktoru Pavel Latuşko İdarə Heyətinin üzvü seçiliblər.
pia.az
Digərxəbərlər
Populyar xəbərlər
