Bu dəqiqələrdə Bakı Şəhər İcra Hakimiyyətinin qarşısında bir qrup heyvansevər aksiya keçirir
Onlar heyvanların hüquqlarının qorunmasını, itlərin küçələrdə sərbəst gəzməsini, peyvəndlənmiş itlərin yenidən küçələrə buraxılmasını tələb edirlər.
“Valideynlər uşaqlarını düzgün tərbiyə etmirlər. Uşaqları itlərlə qorxutmaqlarına son versinlər. İtlər insanlardan qorxur, onların içində aqressivləri də var, amma itləri küçələrdən yığmaq olmaz”, - aksiya iştirakçısından biri əlavə edib.
Heyvansevərlər mətbuatı itlərin hücumu ilə bağlı məlumatlara görə qınayıblar. Onlardan biri deyir ki, itlərin hücumu ilə bağlı şişirdilmiş məlumatlar yayılır. “Bu itlər burada doğulub, biz tələb edirik ki, itlər küçələrdən yığılmasın. Çox mülayim, peyvəndlənmiş itləri də küçədən yığırlar. Heyvanı vurub qaçırlar”, - aksiya iştirakçısı deyib.
Heyvansevərləri Bakı Şəhər İcra Hakimiyyətinin əməkdaşları qəbul edərək şikayətləri dinləyiblər. Onlara şikayətlərinin araşdırılacağı bildirilsə də, bu, heyvansevərləri qane etməyib, əksəriyyət küçəyə çıxaraq, fikirlərini aqressiv formada bildirməkdə davam ediblər.
İtlərin qorunması ilə bağlı aksiya sosial şəbəkələrdə geniş narazılığa səbəb olub, yüzlərlə insan itlərin hücumuna məruz qaldığını, xüsusilə azyaşlıların təhlükədə olduğunu bildirərək sahibsiz itlərlə bağlı konkret tədbir görülməsini istəyiblər. Bir çoxları heyvansevərlərə itləri evlərində saxlamağı məsləhət görüblər.
Xatırladaq ki, ötən həftənin sonunda Binəqədi rayonu, Sulutəpə qəsəbəsində it 4 yaşlı uşağın üzünü, gözünü parçalayıb. Azyaşlı ağır vəziyyətdə Klinik Tibbi Mərkəzə çatdırılıb.
pia.az