Kliniki Tibbi Mərkəz (“Semaşko”) COVİD-19 infeksiyasına yoluxan xəstələr üçün ayrılsa da, xəstəxananın toksikologiya şöbəsi fəaliyyətini əvvəlki qaydada davam etdirir. Havalar isinəndən şöbəyə ilan sancması diaqnozu ilə 42 nəfər müraciət edib...
Bu barədə virtualaz.org-a şöbənin rəhbəri Azər Maqsudov məlumat verib.
Onun sözlərinə görə, gətirilənlərin 8-i azyaşlı olub. “Aprel ayından ilan sancmalar var, lakin ümumilikdə say ötən illərə nisbtən azalıb. Ölkənin müxtəlif bögələrindən-Qazax, Hacıqabul, Şamaxı, Tovuz, Gəncə və digər yerlərdən gətirilənlər olub. Bəzi bölgələrdə xəstəxanalar COVİD-19 infeksiyasına yoluxan xəstələr üçün ayrılıb, bölgələrdən xəstə gətirilməsinin bir səbəbi də budur”,-A.Maqsudov əlavə edib.
Şöbə rəhbəri onu da deyib ki, temperaturu olan bütün xəstələr koronavirusa qarşı test edilir, yoluxma aşkarlandığı halda digər xəstəxanalara köçürülür. Toksikologiya şöbəsinin əməkdaşları arasında virusa yoluxma qeydə alınmayıb.
pia.az