“Azərbaycan tərəfinin mövqeyi aydındır” - Tofiq Zülfüqarov

Keçmiş xarici işlər naziri: “Azərbaycan Qarabağ münaqişəsi ilə bağlı öz mövqeyini bildirib. Sadəcə olaraq BMT-də münaqişə ilə bağlı müzakirələr gedəcək”.

“Hadisələrdən bir neçə gün əvvəl cənab prezident bildirib ki, biz danışıqları konkret sənədin üzərində, qrafik şəklində olandan sonra qəbul edəcəyik. Əgər belə bir sənəd qəbul olunsa və xoş niyyətlərini göstərmək istəyən tərəf erməniləri buna vadar etsə, təbii ki, Azərbaycan danışıqlara qayıdacaq”.

Bu sözləri keçmiş xarici işlər naziri Tofiq Zülfüqarov Almaniyanın Qarabağda müharibəni dayandırmaq üçün etdiyi səyləri PİA.az-a şərh edərkən qeyd edib.

Xəbər verdiyimiz kimi Ermənistan silahlı qüvvələri genişmiqyaslı təxribat törədərək cəbhə boyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutur.

Müdafiə Nazirliyindən verilən məlumata görə, düşmən tərəfindən Tərtər rayonunun Qapanlı, Ağdam rayonunun Çıraqlı və Orta Qərvənd, Füzuli rayonunun Alxanlı və Şükürbəyli və Cəbrayıl rayonunun Cocuq Mərcanlı kəndlərinin intensiv atəşə tutulması nəticəsində mülki əhali arasında həlak olan və yaralananlar var. Mülki infrastruktur obyektlərinə ciddi ziyan dəyib.

Ermənistan silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan Ordusunun komandanlığı tərəfindən qoşunlarımızın bütün cəbhə boyu əks-hücum əməliyyatı başlaması barədə qərar verilib.

Qarabağ münaqişəsinə vasitəçilik edən ölkələr bu vaxta qədər öz mövqelərini bildiriblər. Vasitəçi ölkələrdən heç biri hələki açıq şəkildə tərəf tutmayıb. Hazırda isə Almaniya müharibənin dayandırılmadı üçün ən aktiv vasitəçilik edən tərəf kimi görünür. Merkelin səyləri uğurlu ola bilərmi və Berlin münaqişənin həllində obyektiv olacaqmı?

Mövzunu PİA.az-ın əməkdaşı keçmiş xarici işlər naziri Tofiq Zülfüqarov ilə müzakirə edib.

Tofiq Zülfüqarov: “Azərbaycan tərəfi danışıqların və atəşkə barədə öz mövqeyini bildirib”.

BMT-də müzakirədən sonra diplomatik çağırışların olacağını düşünən keçmiş xarici işlər naziri bildirib ki, Təhlükəsizlik Şurasının və orada sədrlik edən Türkiyənin adından bəyanatlar ola bilər:

“Birincisi onu qeyd etmək lazımdır ki, Azərbaycan Qarabağ münaqişəsi ilə bağlı öz mövqeyini bildirib. Sadəcə olaraq BMT-də münaqişə ilə bağlı müzakirələr gedəcək. Bu müzakirələr o demək deyil ki, hansısa qətnamə qəbul olunacaq. Hesab edirəm ki, BMT-də müzakirədən sonra diplomatik çağırış olacaq. Yəni Təhlükəsizlik Şurasının və orada sədrlik edən Türkiyənin adından bəyanatlar ola bilər.

Amma bilməliyik ki, Azərbaycan tərəfi danışıqların və atəşkə barədə öz mövqeyini bildirib. Yəni hadisələrdən bir neçə gün əvvəl cənab prezident bildirib ki, biz danışıqları konkret sənədin üzərində, qrafik şəklində olandan sonra qəbul edəcəyik. Əgər belə bir sənəd qəbul olunsa və boş niyyətlərini göstərmək istəyən tərəf erməniləri buna vadar etsə, təbii ki, Azərbaycan danışıqlara qayıdacaq”.

Nərminə UMUDLU
pia.az