Azad Rəhimov Tofiq Bəhramovun heykəlini niyə gizlədib? - Fotolar

Daha doğrusu, elə bir yerə aparılıb ki, varlığı ilə yoxluğu bilinmir. Bir neçə il əvvəl gizlədilən heykəlin acı taleyi ilə bağlı məsələni tanınmış idman jurnalisti, qol.az saytının rəhbəri Aydın Bağırov "Tofiq Bəhramovun "yoxa çıxan” heykəli” yazısında yenidən gündəmə gətirib.

PİA.az BakıPost-a istinadən xəbər verir ki, idman tariximizə laqeyd münasibətdən bəhs edilən yazıda heykəlin yoxa çıxarılmasının tarixinə toxunulub və bunun neqativləri sadalanıb. Yazının Tofiq Bəhrəmova aid hissəsini təqdim edirik:

Əvvəl...

"Bu heykəl əvvəlcə stadionun lap girişində ucaldılıb. 2004-cü il oktyabrın 13-də, DÇ-2016-nın Azərbaycan – İngiltərə matçından əvvəl AFFA-nın o vaxtkı prezidenti Ramiz Mirzəyev, o vaxtkı gənclər və idman naziri Əbülfəs Qarayevin iştirakı ilə açılışı olub. Mərasimdə 1966-cı ildə Tofiq Bəhramovun laysmanı olduğu oyunda Almaniyaya o məşhur qolu vuran Cefri Herst də iştirak edib. 2012-ci ildə stadionda aparılan təmir işləri zamanı isə Bəhramovun heykəli götürülüb və arenanın inzibatı binası ilə stadionun idman sarayının qarşısında yerləşdirilib. Həmin vaxt rəsmi olaraq belə bir açıqlama verilib ki, bu dəyişiklik həm stadionun əsas girişinin qarşısını genişləndirmək, həm də abidənin inzibati bina qarşısında daha möhtəşəm görünüşünü təmin etmək məqsədilə edilib.

Bəs, o inzibati bina harda yerləşir? 2012-ci ildən üzü bu yana əvvəlcə "Neftçi”nin, daha sonra "Qarabağ”ın avrokubok matçlarına gələn üst-üstə yüzminlərlə azarkeşin həmin binadan da, o heykəlin varlığından da xəbəri olmayıb. Çünki elə bir yerdə yerləşir ki (əsas girişdən sola dönüb azarkeşlər arasında "tablonun altı” kimi tanınan sektorlar istiqamatinə hərəkət edəndə), onu oyunlara gələn azarkeşlərin üç-beş faizi görə, ya görməyə.

... Sonra

Qəribəsi isə odur ki, heykəl "stadionun əsas girişinin qarşısını genişləndirmək” adı ilə oradan götürülüb. Halbuki o, ətrafdakı yaşıllığı ilə birgə cəmi 20-25 metr ərazini əhatə edib və bunun 8 il ərzində (2004-2012-ci illərdə) arenaya gələn yüzminlərlə azarkeşə heç bir maneçiliyi olmayıb. Əksinə Tofiq Bəhramovun heykəli stadionun memarlığına əlavə rəng qatıb. Gələn xaricilər də bu günədək Tofiq Bəhranovu tanımayıblarsa belə, onun şəxsiyyəti ilə maraqlanmağa başlayıblar.

İndi isə...

Heykəl geniş kütlənin görmədiyi, başqa sözlə, heç kimə lazım olmayan bir yerdədir. Niyə və Tofiq Bəhramovun kiçik heykəli neçə hektar ərazidə kimə mane ola bilərdi? Və onu əvvəlki yerinə qaytarmaq, böyük hakimimizin əziz xatirəsinə bu soyuq münasibətə son qoymaq çoxmu çətindir?

Ümid edirəm, bir gün Gənclər və İdman Nazirliyi heç olmasa, sonuncu suala cavab verəcək”.

pia.az