“Türkiyə-Rusiya münasibətləri Azərbaycan-Rusiya münasibətləri ilə bilavasitə bağlı olmayan məsələlərdir”
Deputat Asim Mollazadə: “Azərbaycanla Rusiyanın tərəfdaşlıq, qonşuluq siyasəti ayrı, amma Putinin Avropa Oyunlarına gəlməyini mən təbii qarşılayıram”
Bildiyimiz kimi, Türkiyə prezidenti Rəcəb Tayyib Ərtdoğanın ardınca Rusiya prezidenti Vladimir Putinin də I Avropa Yay Oyunlarının açılış mərasiminə qatılmaq üçün Bakıya gələcəyi dəqiqləşib. Əslində Putinin Bakı səfəri gözlənilən idi. Çünki Rusiya prezidenti aprelin 24-də İrəvana səfər etməklə Azərbaycanı məyus etmişdi. Bu da Dağlıq Qarabağ məsələsində Rusiyanın ədalətli münsif olmadığı barədə rəsmi Bakının qənaətini möhkəmləndirmişdi.
Ümumiyyətlə Putinin Bakıya gəlməsi Bakının Kremlə etdiyi son reveranslara görə minnətdarlıq jesti kimi qiymətləndirilə bilərmi? Putinin Bakı səfərinin bir çox səbəbləri ola bilər, məsələn Azərbaycanın Avrasiya Birliyinə qoşulması, son vaxtlar Türkiyə ilə Rusiya arasında sərinləşən əlaqələri bərpa etmək, Putinin məşhur “Türk axını» layihəsini reallaşdırmaq üçün Ankara ilə münasibətləri yeni səviyyəyə gətirmək və s. Putin gözlənilən səfəri çərçivəsində hansısa siyasi dividend əldə edə biləcəkmi?
Bu suallarla PİA.AZ-ın əməkdaşı Millət vəkili, Demokratik İslahatlar Partiyasını sədri Asim Mollazadəyə müraciət etdi. Millət vəkili bildirdi ki, Putinin Azərbaycana gəlməsində hansısa bir siyasi motivlər əsas deyil, əsas səbəb məhz I Avropa Yay Oyunlarına olan hörmətdir.
Asim Mollazadə: “Söhbət hər-hansısa bir jestdən getmir”.
“Mən belə hesab edirəm ki, I Avropa Yay Oyunlarına iştirakçı ölkələrin dövlət başçılarının ələlxüsüs da, qonşu ölkə prezidentlərinin gəlməyi normal hadisədir. Söhbət hər-hansısa bir jestdən getmir, söhbət qarşılıqlı tərəfdaşlıq münasibətlərindən gedir. Azərbaycanla Rusiyanın tərəfdaşlıq, qonşuluq siyasəti ayrı, amma Putinin Avropa Oyunlarına gəlməyini mən təbii qarşılayıram.
Mənə elə gəlir ki, bu tamamilə fərqli məsələlərdi. Çünki Türkiyə -Rusiya münasibətləri Azərbaycan-Rusiya münasibətləri ilə bilavasitə bağlı olmayan məsələlərdir. İdman bayramında dövlət başçılarının iştirakında hansısa siyasi məqsədləri olmasını düzgün hesab etmirəm. Burada ilk növbədə qısa müddətli, məhz Avropa Oyunlarının açılışında iştirak, hər bir dövlət başçısı üçün müəyyən qədər müsbət bir hadisədir. Ona görə də prezidentlərin Bakıya gəlməsinin əsas səbəbini məhz olan I Avropa Yay Oyunlarına hörmət kimi qiymətləndirirəm”.
Nərminə UMUDLU
pia.az
Digərxəbərlər
Populyar xəbərlər
