Xətai rayon İcra Hakimiyyətində müşavirə keçirilib

28.07.2016-cı il tarixdə Xətai rayon İcra Hakimiyyətində rayon İcra Hakimiyyəti başçısı Razim Məmmədovun rəhbərliyi ilə müşavirə keçirilib

PİA.AZ xəbər verir ki, tədbirdə millət vəkili Hüseynbala Mirələmov, rayon hüquq-mühafizə orqanlarının, MKTB-nin, sahə və qəsəbə nümayəndəliklərinin, xidmət sahələrinin rəhbərləri, Xətai və Əhmədli bələdiyyələrinin sədrləri və digər əlaqədar təşkilatların nümayəndələri iştirak ediblər.

Müşavirədə rayon ərazisində aparılan abadlıq-quruculuq və yenidənqurma işləri, yüksək mərtəbəli binalarda aparılan təmir işləri, yay mövsümündə rayon ərazisinin sanitar –gigiyenik vəziyyəti, baş verə biləcək yangın hadisələrinin qarşısının alınması məqsədilə ərazilərdə quru otların təmizlənməsi və digər tədbirlərin görülməsi, yeni dərs ilinə hazırlıqla bağlı məktəb və bağçalarda cari təmir işləri, rayon ərazisindəki xüsusi proqramla təmiri həyata keçirilən 5 yaşayış binasındakı və Nazirlər Kabinetinin qərarına əsasən sökülüb yenidən tikiləcək qəzalı binalardakı mövcud vəziyyət müzakirə edilib.

Müşavirədə həmçinin qeyd olunub ki, rayon sakinlərinin asudə vaxtlarının, istirahətinin daha səmərəli təşkil olunması çərçivəsində yeni nümunəvi həyətlərin tikilməsi ilə əlaqədar YAP Xətai rayon təşkilatı ilə birgə irəli sürülən təşəbbüs rayon sakinləri tərəfindən dəstəklənir və yüksək qiymətləndirilir. Bu məqsədlə rayon İcra Hakimiyyətinin başçısı Razim Məmmədovun müvafiq sərəncamına əsasən komissiya yaradılıb, tədbirlər planı hazırlanıb. Plana əsasən , daha öncədən rayon ərazisində mövcud olan 70 nümunəvi həyətdə bir sıra yenidənqurma və cari təmir işləri aparılacaq, daha 31 ünvanda isə bu tipli yeni həyətlər salınacaq. Layihəyə əsasən, bu həyətlərdə sakinlərin və uşaqların asudə vaxtlarını daha maraqlı keçirmələri üçün əyləncə, idman və s. qurguları quraşdırılacaq. Görüləcək işlərin sentyabr ayının 15-dək yekunlaşdırılması nəzərdə tutulur.