Zaur Məmmədov: “Ermənistan hökumətinin son günlər bir-birinin ardınca verdiyi məntiqsiz açıqlamaların hamısı erməni ictimaiyyətinə yönəlib. Sarkisyan hakimiyyətdə qalmaq üçün bu cür gedişlərdən istifadə edir”
“İctimaiyyətə çatdırmaq istəyirlər ki, ətraf rayonların qaytarılmasının əvəzinə Azərbaycan Dağlıq Qarabağ ərazisinə hərbi müdaxilə etməyəcək və beləliklə, bölgə müstəqil olacaq”.
Bu fikirləri PİA.AZ-a siyasi elmlər üzrə fəlsəfə doktoru, politoloq Zaur Məmmədov Ermənistan prezidenti Serj Sarkisyanın Dağlıq Qarabağla bağlı səsləndirdiyi yeni şərtlərə münasibətini şərh edərkən bildirib.
Qeyd edək ki, son vaxtlar Azərbaycan-Ermənistan Dağlıq Qarabağ münaqişəsi dünyanın diqqət mərkəzindədir. Rusiya Xarici İşlər naziri Sergey Lavrovun Yerevana səfərindən sonra Sarkisyan hökumətinin rəsmiləri bir-birindən məntiqsiz açıqlamaları gündəmi əsas məsələdən, Ermənistan qoşunlarının Azərbaycanın işğal olunmuş ərazilərindən çıxarılması məsələsindən uzaqlaşdırmaq məqsədi ilə müxtəlif səpkidə bəyanatlarla çıxış edirlər. Son olaraq, Ermənistan prezidenti Serj Sarkisyan Dağlıq Qarabağ münaqişəsi ilə bağlı yeni şərtlərlə çıxış edib. İrəli sürülən şərtlər arasında xüsusən, “Azərbaycan Dağlıq Qarabağ əhalisinə qarşı aqressiyaya əl atmayacağına dair zəmanət verməlidir”, şərti diqqət çəkir. Belə bir şərtin ortaya atılması onu deməyə əsas verirmi ki, Ermənistan sülh sazişinə hazırlıq içindədir?
Zaur Məmmədov: “Dağlıq Qarabağda yaşayan ermənilər Azərbaycan vətəndaşlarıdır”.
PİA.AZ-ın əməkdaşı bu mövzunu siyasi elmlər üzrə fəlsəfə doktoru , politoloq Zaur Məmmədovla müzakirə edib. Politoloqun fikrincə, bu mənasız bəyanatlar daxili auditoriyaya ünvanlanmış, onları psixiloji olaraq mövcud vəziyyətə hazırlamaq üçün atılmış addımlardır:
“Sarkisyan hökumətinin qarşısına ətraf rayonların qaytarılması barədə tələb qoyulub. Son günlər Ermənistan rəhbərliyinin məntiqi sonluğu tamamlamayan bəyanatları onu göstərir ki, düşmən ölkənin rəhbərliyi çaşqınlıq içərisindədir. Belə bəyanatların çoxu Azərbaycandan daha çox erməni ictimaiyyətinə ünvanlanır. Sarkisyan hakimiyyətdə qalmaq üçün bu cür gedişlərdən istifadə edir. Azərbaycan Ermənistan hökumətinin qarşısına ətraf rayonların qaytarılması haqqında açıq şərt qoyub, ermənilərə müəyyən vaxt verib.
Sarkisyan isə, guya erməni xalqının mənafeyini, maraqlarını müdafiə edən lider kimi görünmək istəyir. Aprel ayı ərzində verilən bütün bəyanatlar daxili auditoriya üçün nəzərdə tutulub. Əslində Sarkisyanın manevr etmək şansı demək olar ki, yoxdur. Azərbaycanın Dağlıq Qarabağ əhalisinə qarşı aqressiyaya əl atmayacağına dair zəmanət istənilməsi bəndi olduqca gülüncdür. Onsuzda ordumuz heç vaxt dinc əhaliyə qarşı zor işlətməyib .Erməni tərəfindən fərqli olaraq, Azərbaycan beynəlxalq hüquqa hörmət edir və heç bir halda dinc əhaliyə qarşı silahdan istifadə etməz.
Dağlıq Qarabağda yaşayan ermənilər Azərbaycan vətəndaşlarıdırlar. Sadəcə olaraq, Ermənistan hakimiyyəti erməni ictimaiyyətini ətraf rayonların qaytarılması proresinə psixoloji hazırlayır. İctimaiyyətə çatdırmaq istəyirlər ki, ətraf rayonların qaytarılmasının əvəzinə Azərbaycan Dağlıq Qarabağ ərazisinə hərbi müdaxilə etməyəcək və beləliklə, bölgə müstəqil olacaq”.
Sübü ƏZİZOVA
pia.az
Digərxəbərlər
Populyar xəbərlər
